रक्तदानाची अठरावी ‘इनिंग’! धीरज हाडगे यांनी जपली समाजसेवेची नाळ
– स्वयं रक्तदाता जिल्हा समितीच्या माध्यमातून गरजू रुग्णांसाठी सातत्याने योगदान
The गडविश्व
गडचिरोली, दि.०५ : गरजू रुग्णांना वेळेवर रक्त उपलब्ध व्हावे, या सामाजिक जाणिवेतून आरमोरी तालुक्यातील देऊळगाव येथील धीरज कृष्णा हाडगे यांनी आपल्या आयुष्यातील १८वे रक्तदान करून समाजसेवेची नाळ अधिक घट्ट केली. गडचिरोली येथील जिल्हा सामान्य रुग्णालयाच्या रक्तपेढीत त्यांनी रक्तदान केले.
धीरज हाडगे हे स्वयं रक्तदाता जिल्हा समितीचे सहकारी सदस्य असून, रक्तदानाच्या माध्यमातून गरजू रुग्णांना मदत करण्यासाठी ते सातत्याने सक्रिय आहेत. रक्ताची निकड असलेल्या रुग्णांना वेळेत रक्त मिळावे, यासाठी समितीच्या माध्यमातून विविध सामाजिक उपक्रम राबविले जातात. या कार्यात हाडगे यांचा सातत्यपूर्ण सहभाग उल्लेखनीय आहे.
रक्तदान ही केवळ सामाजिक जबाबदारी नसून एखाद्याचे प्राण वाचविण्याचे प्रभावी माध्यम आहे, हा संदेश आपल्या कृतीतून देत हाडगे यांनी आतापर्यंत १८ वेळा रक्तदान केले आहे. त्यांच्या या सेवाभावी कार्यामुळे रक्तदानासाठी पुढे येणाऱ्या युवकांना प्रेरणा मिळत आहे.
“रक्तदानामुळे एखाद्या गरजू रुग्णाचे प्राण वाचण्यास मदत होत असेल, तर त्यापेक्षा मोठे समाधान नाही. निरोगी नागरिकांनी नियमित रक्तदानासाठी पुढे यावे,” असे आवाहन धीरज हाडगे यांनी केले.
या १८व्या रक्तदानाबद्दल आकाश आंबोरकर, स्वयं रक्तदाता जिल्हा समितीचे सहकारी, मित्रपरिवार, सामाजिक कार्यकर्ते आणि नागरिकांनी धीरज हाडगे यांचे अभिनंदन केले.
‘रक्तदान करा, जीवन वाचवा’ हा संदेश देत धीरज हाडगे यांनी समाजसेवेची अठरावी ‘इनिंग’ पूर्ण केली असून, त्यांचा हा उपक्रम युवकांसाठी निश्चितच प्रेरणादायी ठरत आहे.
