खलनायकाच्या दमदार भूमिका गाजवणारे ज्येष्ठ अभिनेते प्रदीप रावत यांचे निधन
– हिंदीसह दक्षिण भारतीय चित्रपटसृष्टीत शोककळा
The गडविश्व
मुंबई, दि. ४ : हिंदी, तेलुगू, तमिळसह विविध भारतीय चित्रपटसृष्टीत खलनायकाच्या दमदार भूमिकांसाठी ओळखले जाणारे ज्येष्ठ अभिनेते प्रदीप रावत यांचे वयाच्या ७४ व्या वर्षी निधन झाले. त्यांच्या निधनामुळे चित्रपटसृष्टीत शोककळा पसरली असून, चाहते आणि सहकलाकारांकडून त्यांना भावपूर्ण श्रद्धांजली अर्पण करण्यात येत आहे.
चार दशकांहून अधिक काळाच्या अभिनय कारकिर्दीत प्रदीप रावत यांनी हिंदीसह तेलुगू, तमिळ, कन्नड, मल्याळम आणि भोजपुरी चित्रपटांमध्ये काम केले. प्रभावी व्यक्तिमत्त्व, भारदस्त आवाज आणि दमदार संवादफेकीमुळे त्यांनी खलनायकाच्या भूमिकांमध्ये स्वतंत्र ओळख निर्माण केली.
‘सरफरोश’, ‘गजनी’ आणि ‘सैये’ यांसारख्या चित्रपटांमधील त्यांच्या भूमिका विशेष गाजल्या. तसेच, दूरदर्शनवरील गाजलेल्या ‘महाभारत’ मालिकेत त्यांनी साकारलेली अश्वत्थामाची भूमिका आजही प्रेक्षकांच्या स्मरणात आहे.
विविध भाषांतील चित्रपटांमध्ये आपल्या अभिनयाचा ठसा उमटविणाऱ्या प्रदीप रावत यांच्या निधनाने भारतीय चित्रपटसृष्टीने एक अनुभवी आणि बहुआयामी कलाकार गमावल्याची भावना व्यक्त होत आहे.
