26 दिवसांनंतर सोनम वांगचुक यांचे उपोषण समाप्त ; ‘संभाव्य हिंसाचार टाळण्यासाठी निर्णय’
The गडविश्व
नवी दिल्ली, दि. २४ : सामाजिक कार्यकर्ते सोनम वांगचुक यांनी तब्बल 26 दिवसांनंतर आपले बेमुदत उपोषण मागे घेतले आहे. दीर्घ चर्चेनंतर तसेच देशात संभाव्य हिंसाचाराची शक्यता लक्षात घेऊन हा निर्णय घेतल्याचे त्यांनी स्पष्ट केले. गुरुवारी मध्यरात्रीनंतर हरियाणातील गुरुग्राम येथील मेदांता रुग्णालयात त्यांनी उपोषण सोडले. यावेळी केंद्रीय मंत्री जे. पी. नड्डा, डॉ. जितेंद्र सिंह तसेच वांगचुक यांच्या पत्नी गीतांजली वांगचुक उपस्थित होत्या.
उपोषणानंतरची पहिली प्रतिक्रिया
उपोषण समाप्त केल्यानंतर शुक्रवारी वांगचुक यांनी सोशल मीडिया प्लॅटफॉर्म ‘एक्स’ (X) वर पहिली प्रतिक्रिया नोंदवली. त्यांनी रुग्णालयातील बेडवरून काढलेले छायाचित्रही शेअर केले. या छायाचित्रात जे. पी. नड्डा, डॉ. जितेंद्र सिंह आणि इतर काही मान्यवर त्यांच्यासोबत दिसत आहेत.
विविध राजकीय पक्षांतील 65 खासदारांनी त्यांची भेट घेतली होती किंवा उपोषण मागे घेण्याची विनंती करणाऱ्या पत्रांवर स्वाक्षऱ्या केल्या होत्या, असे वांगचुक यांनी आपल्या पोस्टमध्ये म्हटले आहे.
विविध अटींवर दीर्घ चर्चा झाल्यानंतर आणि देशात संभाव्य हिंसाचार होण्याची शक्यता लक्षात घेऊन हा निर्णय घेण्यात आला. या चर्चेदरम्यान कोणत्या अटींवर सहमती झाली, याबाबतचा सविस्तर खुलासा आपण लवकरच स्वतंत्र व्हिडिओद्वारे करणार असल्याचेही त्यांनी सांगितले.
28 जूनपासून सुरू होते बेमुदत उपोषण
दिल्लीतील जंतर-मंतर येथे कॉकरोच जनता पक्ष (CJP) यांच्या नेतृत्वाखाली सुरू असलेल्या NEET पेपरफुटीविरोधातील आंदोलनात सहभागी झाल्यानंतर वांगचुक यांनी 28 जूनपासून बेमुदत उपोषण सुरू केले होते. केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी तसेच देशाच्या शिक्षण व्यवस्थेत व्यापक आणि पारदर्शक सुधारणा करण्याची मागणी करणाऱ्या विद्यार्थ्यांशी ऐक्य दर्शवण्यासाठी त्यांनी उपोषणाचा मार्ग स्वीकारला होता.
जंतर-मंतरवरून रुग्णालयात हलवले
प्रकृती खालावल्याने 18 जुलै रोजी वांगचुक यांना जंतर-मंतर येथील आंदोलनस्थळावरून सफदरजंग रुग्णालयात दाखल करण्यात आले. त्यानंतर अधिक उपचारांसाठी त्यांना गुरुग्राममधील मेदांता रुग्णालयात हलविण्यात आले. उपचार सुरू असतानाही त्यांनी उपोषण कायम ठेवले. अखेर गुरुवारी मध्यरात्री त्यांनी उपोषण मागे घेत आपल्या आंदोलनाच्या या टप्प्याची सांगता केली.
#thegadvishva #thegdv #gadchrilinews #breakingnews #SonamWangchuk #HungerStrike #NEET #NEETPaperLeak #EducationReforms #NewDelhi #JPNadda #JitendraSingh #StudentsProtest #IndiaNews #BreakingNews #Education #Protest #MedantaHospital #JantarMantar
