लॉयड्स समर कॅम्पने फुलवली 465 चिमुकल्यांची स्वप्ने
– शिक्षण, क्रीडा अन् जीवनकौशल्यांची अनोखी मेजवानी
The गडविश्व
गडचिरोली, दि. १६ : ग्रामीण भागातील विद्यार्थ्यांच्या सर्वांगीण विकासाला चालना देण्याच्या उद्देशाने लॉयड्स इन्फिनिट फाउंडेशन आणि लॉयड्स मेटल्स अँड एनर्जी लिमिटेड (एलएमईएल) यांच्या संयुक्त विद्यमाने आयोजित करण्यात आलेल्या ‘लॉयड्स समर कॅम्प 2026’ या उपक्रमाने तब्बल 465 चिमुकल्यांची स्वप्ने फुलवली. हेडरी आणि कोन्सरी येथे झालेल्या या कॅम्पमधून विद्यार्थ्यांना शिक्षण, क्रीडा, सर्जनशीलता आणि जीवनकौशल्यांचा अनोखा संगम अनुभवता आला.
हेडरी येथे 5 ते 14 जून या कालावधीत आयोजित करण्यात आलेल्या कॅम्पमध्ये 265 विद्यार्थ्यांनी सहभाग घेतला, तर कोन्सरी येथे 6 ते 12 जूनदरम्यान झालेल्या कॅम्पमध्ये 200 विद्यार्थ्यांनी उत्साहाने हजेरी लावली. परिसरातील विविध गावांतील विद्यार्थ्यांनी मोठ्या संख्येने सहभाग नोंदवत उपक्रमाला भरभरून प्रतिसाद दिला.
दहा दिवसांच्या या कॅम्पमध्ये विद्यार्थ्यांच्या शारीरिक, मानसिक आणि सामाजिक विकासावर विशेष भर देण्यात आला. दररोज वॉर्म-अप व्यायामाने दिवसाची सुरुवात होत होती. त्यानंतर चित्रकला, कला व हस्तकला, नृत्य, योग, झुंबा, इनडोअर-आऊटडोअर खेळ, टीम-बिल्डिंग उपक्रम आणि संवादात्मक शिक्षण सत्रांचे आयोजन करण्यात आले.
क्रीडा क्षेत्रातील कौशल्यविकासासाठी कबड्डी, व्हॉलीबॉल, क्रिकेट, ॲथलेटिक्स आणि तिरंदाजी यांचे विशेष प्रशिक्षण देण्यात आले. तसेच क्रीडा दुखापत व्यवस्थापनाबाबतही विद्यार्थ्यांना प्रात्यक्षिकांसह मार्गदर्शन करण्यात आले.
विद्यार्थ्यांमध्ये सुरक्षिततेबाबत जागरूकता निर्माण करण्यासाठी गुड टच-बॅड टच, अग्निसुरक्षा, प्रथमोपचार आणि सीपीआर (CPR) यांसारख्या विषयांवर विशेष सत्रे घेण्यात आली. संवादकौशल्य, नेतृत्वगुण, संघभावना, आत्मविश्वास आणि शिस्त यांवर आधारित व्यक्तिमत्त्व विकास कार्यशाळांमुळे विद्यार्थ्यांचा शिकण्याचा अनुभव अधिक समृद्ध झाला.
सहभागी विद्यार्थ्यांच्या आरोग्याची काळजी घेत दररोज नाश्ता आणि अल्पोपहाराची व्यवस्था करण्यात आली होती. तसेच आसपासच्या गावांमधून येणाऱ्या विद्यार्थ्यांसाठी सुरक्षित वाहतूक सुविधाही उपलब्ध करून देण्यात आली.
कॅम्पचा समारोप उत्साहपूर्ण वातावरणात झाला. यावेळी ग्रामप्रतिनिधी, पालक, मान्यवर आणि लॉयड्सचे अधिकारी उपस्थित होते. विविध स्पर्धांतील विजेत्यांचा गौरव करण्यात आला, तर सर्व विद्यार्थ्यांना सहभाग प्रमाणपत्रे आणि भेटवस्तू देऊन त्यांच्या उत्साहाचे कौतुक करण्यात आले.
यावेळी लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरन यांनी सांगितले की, “मुलांमध्ये केलेली गुंतवणूक म्हणजे गडचिरोलीच्या भविष्यातील गुंतवणूक आहे. विद्यार्थ्यांना आत्मविश्वास, नेतृत्वगुण आणि जीवनकौशल्ये विकसित करण्यासाठी अशा उपक्रमांची गरज आहे. भविष्यातही अशा अर्थपूर्ण उपक्रमांद्वारे ग्रामीण भागातील मुलांच्या सर्वांगीण विकासासाठी आम्ही कटिबद्ध राहू.”
लॉयड्स समर कॅम्प 2026 ने शिक्षण आणि मनोरंजनाचा सुंदर मेळ घालत विद्यार्थ्यांना नवे अनुभव, नवी ऊर्जा आणि उज्ज्वल भविष्यासाठी नवी दिशा दिली. सामाजिक विकासाच्या दिशेने लॉयड्सचा हा उपक्रम गडचिरोली जिल्ह्यातील बालकांसाठी प्रेरणादायी ठरत आहे.
