– दोन जवान शहीद, दोन जखमी झाल्याची माहिती, ठार नक्षल्यांचा आकडा वाढण्याची शक्यता
The गडविश्व
बिजापूर, दि. ०९ : छत्तीसगड – महाराष्ट्र सीमेवरील बिजापूर जिल्ह्यातील नॅशनल पार्क परिसरात पोलीस नक्षल चकमक उडाली. या चकमकीत १२ नक्षल्यांना कंठस्नान घालण्यात पोलीस दलास यश आले आहे तर दोन जवान शहीद तर दोन जवान जखमी झाल्याचे वृत्त आहे. घटनास्थळी शोधमोहीम सुरू असल्याची माहिती असून ठार झालेल्या नक्षल्यांचा आकडा वाढण्याची शक्यता असल्याचे बोलल्या जात आहे.
बस्तरचे आयजी सुंदरराज पी यांनी या चकमकीला दुजोरा दिला असल्याचे समजत आहे. मोठ्या प्रमाणात नक्षली जंगल परिसरात असल्याची माहिती पोलीस दलास मिळाली होती. त्या आधारे बिजापूरच्या डीआरजी, एसटीएफ आणि बस्तर फायटरच्या जवानांनी नक्षल्यांना घेरले असता चकमक उडाली. या चकमकीत आतापर्यंत १२ नक्षली ठार झाल्याचे बोलल्या जात असून हे एक मोठे ऑपरेशन आहे त्यामुळे आकडा स्पष्टपणे सांगता येणार नाही, मात्र नक्षलवाद्यांचे मोठे नुकसान झाल्याचे स्पष्ट झाले आहे असे डीआयजी कमलोचन कश्यप यांनी सांगितले आहे. दरम्यान घटनास्थळावरून पोलीस दल परतल्यानंतर संपूर्ण माहिती कळू शकणार आहे.
https://x.com/ani_digital/status/1888477172567781671?s=19
