The गडविश्व
गडचिरोली, ३१ ऑगस्ट : कुरखेडा येथील दोघेजण छत्तीसगड राज्यात वराह विक्री करून परत येत असताना वाटेत पोलिस मदत केंद्र बेडगाव हद्दीतील बोरी जवळ त्यांना मारहाण करून चारचाकी वाहनातील मोठी रक्कम चोरी केल्याप्रकरणी गुन्हे शाखा गडचिरोली तसेच कोरची पोलिस ठाणे येथील पथकाने रात्री विजय ऊर्फ पपु प्रकाश गुप्ता (४४)वर्षे, रा. रांजणदगाव, गणेशवर सिताराम सिन्हा (३५) यांना अटक केली. आरोपींना न्यायालयात हजर केले असता, न्यायालयाने ४ दिवसाची पोलिस कोठडी सुनावली आहे तर इतर आरोपींचा शोध घेणे सुरु आहे.
मिळालेल्या माहितीनुसार, २८ ऑगस्ट कुरखेडा हद्दीतील मारोती लक्ष्मण गोतमारे (२६), विलास मांजरे (४३) हे त्यांचे कडील गावठी डुक्करे ५० नग विक्री करण्यासाठी नरेंद्र कुमार रा.बालोद (छत्तीसगड) येथे गेलेले होते. विक्री करून मिळालेले १ लाख५० हजार रुपये घेऊन परत येत असताना पोलिस मदत केंद्र बेडगाव हद्दीतील बोरी या गावा जवळ २ इसमाना ८ ते ९ इसम मारहाण करत असल्याचे दिसून आले. त्यापैकी एक अनोळखी व्यक्ती यांच्या गाडी जवळ येऊन त्यांचे मोबाईल व गाडीची चावी हिसकावून मारहाण करत जमिनीवर पाडून ८ ते ९ इसमांनी हॉकी स्टिक, लोखंडी रोड व लाकडाच्या काठीने जबर मारहाण केली. तसेच त्यांच्या वाहनातील १ लाख ४८ हजार रुपये घेऊन पसार झाले. घटनास्थळी हजर होत पाहणी केली असता तिथे जमलेले लोक आपसात पप्पू गुप्ता ने या लोकाना मारले आहे अशी चर्चा करत होते. फिर्यादीने पोमकें बेडगाव येथे हजर होत पप्पू गुप्ता व त्याचे ८ साथीदार यांचे विषयी कायदेशीर फिर्याद दिली. त्यावरून कोरची पोलिस ठाणे येथे 84/23 भा.द.वि 397,341,427 प्रमाणे गुन्हा दाखल करण्यात आला.
सदर प्रकरणात गुन्हे शाखा गडचिरोली तसेच कोरची पोलिस ठाणे येथील २ पथक आरोपीचे शोध कामी रवाना करण्यात आले असता रात्रो उशीरा विजय ऊर्फ पपु प्रकाश गुप्ता (४४), रा. रांजणदगाव, गणेशवर सिताराम सिन्हा(३५) यांना ताब्यात घेतले. आरोपींना कोरची पोलीसांनी अटक करून न्यायालयात हजर केले असता, न्यायालयाने ४ दिवसाची पोलिस कोठडी सुनावली आहे. इतर आरोपींचा शोध घेण्याकरीता वेगवेगळ्या टीम रवाना केल्या असून, इतर आरोपी लवकरच ताब्यात घेतले जाणार असल्याचे कळते. पुढील तपास पोलीस अधीक्षक गडचिरोली नीलोत्पल सा.,अपर पोलीस अधीक्षक (प्रशासन) कुमार चिंता सा. तसेच उपविभागीय पोलीस अधिकारी साहील झरकर यांच्या मार्गदर्शनाखाली पोउपनि. विठ्ठल सुर्यवंशी करत आहेत.
