– आता भाजप प्रदेशाध्यक्ष बावनकुळे ढाब्यावर येतील काय ?
The गडविश्व
चंद्रपूर, २९ सप्टेंबर : काही दिवसांपूर्वी भाजपचे प्रदेशाध्यक्ष चंद्रशेखर बावनकुळे यांनी पत्रकार हे टिल्लूपंप आहेत, तुम्ही त्यांना चहा पाजलात किंवा ढाब्यावर घेऊन गेलात तर बातम्या प्रसिद्ध करतात, असे सांगून पत्रकारांचा अपमान केला होता. त्यांच्या वक्तव्यामुळे राज्यभरातील पत्रकार दुखावले असून त्यांच्यावर सर्वत्र निषेध प्रकट केला जात आहे. चंद्रपूरातही डिजिटल मीडिया संस्थेने निषेध नोंदवत “या बावनकुळे धाब्यावर” या नावाने एक कार्यक्रम आयोजित करण्याचे ठरवले असून संस्थेच्या वतीने बावनकुळे यांना रविवार १ ऑक्टोबर रोजी चंद्रपूर येथील लोहारा ढाब्यावर रात्री ८:०० वाजता सावजी भोजनासाठी आमंत्रित केले आहे. त्यामुळे आता बावनकुळे यांनी पत्रकारांना ढाब्यावर घेऊन जाण्याचे प्रकरण पुन्हा तापले असून बावनकुळे ढाब्यावर येतील काय ? याकडे लक्ष लागले आहे.
बावनकुळे यांनी आम्हा पत्रकारांना ढाब्यावर अनेकदा खाऊ घातला आणि चहाही दिला, त्यामुळे आता त्यांच्यासाठी आमच्याकडून ही रिटर्न गिफ्ट पार्टी असल्याचे संघटनेने म्हटले आहे. या निमंत्रित मेजवानीला बावनकुळे आले नाहीत तर मात्र त्यांचा तिथे निषेध करण्यात येईल. येत्या नवरात्रीच्या काळा पासून त्यांच्या जिभे मधून कोणतेही वाईट शब्द येऊ नयेत यासाठी गणेशाने त्यांना सद्बुद्धी आणि वरदान द्यावे, अशी प्रार्थनाही संस्थेने केली आहे.
संस्थेच्या या बैठकीत डिजिटल मीडिया असोसिएशन चंद्रपूरचे अध्यक्ष जितेंद्र चोरडिया, जितेंद्र जोगड, राजेश नायडू, दिनेश एकवणकर, जयपाल गेडाम यांच्यासह पदाधिकारी व सदस्य मोठ्या संख्येने उपस्थित होते.
(the gdv, the gadvishva, chandrpur, digital media, chandrkant bavankuld, dhabyavar ya)
