दुर्गम गडचिरोलीत आरोग्यसेवेची मोठी झेप; एलकेएएम रुग्णालयात वेदनारहित प्रसूतीसह ४००वा सुरक्षित जन्म
The गडविश्व
गडचिरोली, दि. २० : दुर्गम आणि आदिवासी भागातील आरोग्यसेवेला नवे बळ देत हेदरी येथील लॉयड्स काली अम्माल मेमोरियल (एलकेएएम) रुग्णालयाने उल्लेखनीय कामगिरी नोंदवली आहे. अत्याधुनिक तंत्रज्ञानाच्या सहाय्याने वेदनारहित (एपिड्युरल) सामान्य प्रसूती यशस्वीरीत्या पार पाडत रुग्णालयाने ४००व्या सुरक्षित बाळाच्या जन्माचा महत्त्वपूर्ण टप्पा गाठला आहे. या दुहेरी यशामुळे जिल्ह्यातील मातृत्व सेवेत सकारात्मक बदल घडत असल्याचे स्पष्ट झाले आहे.
अलीकडेच रुग्णालयात एपिड्युरल अॅनेस्थेशियाच्या सहाय्याने पार पडलेली सामान्य प्रसूती ही ग्रामीण भागासाठी दिलासादायक ठरली. ही प्रक्रिया कोणत्याही गुंतागुंतीशिवाय पूर्ण झाली असून एपिसिओटॉमीची आवश्यकता भासली नाही, पेरिनियल टिअर झाले नाहीत तसेच प्रसूतीनंतरचा रक्तस्राव (PPH) टाळण्यात यश आले. ‘डिलेयड कॉर्ड क्लॅम्पिंग’ आणि वाय-फाय सक्षम CTG मॉनिटरिंगसारख्या आधुनिक पद्धतींचा वापर करून आई व बाळाची सुरक्षितता सुनिश्चित करण्यात आली.
दरम्यान, ४००व्या सुरक्षित प्रसूतीचा मान गार्डेवाडा येथील १९ वर्षीय सविता टोप्पो यांना मिळाला. उच्च-जोखीम गर्भावस्थेमुळे त्यांना प्राथमिक आरोग्य केंद्र, गट्टा येथून एलकेएएम रुग्णालयात रेफर करण्यात आले होते. परिस्थितीचे गांभीर्य ओळखून वैद्यकीय पथकाने तातडीने उपचार करत १५ एप्रिल २०२६ रोजी बाळाचा सुरक्षित जन्म घडवून आणला. सध्या माता व बाळ दोघेही निरोगी असून तज्ज्ञांच्या देखरेखीखाली आहेत.
एलकेएएम रुग्णालयाची ही कामगिरी केवळ वैद्यकीय यशापुरती मर्यादित नसून दुर्गम भागातील नागरिकांना मोफत, सुलभ आणि दर्जेदार आरोग्यसेवा देण्याच्या बांधिलकीचे प्रतीक आहे. स्थापनेपासूनच रुग्णालयाने हजारो कुटुंबांना दिलासा देत मातृ व बाल आरोग्य सुधारण्यात महत्त्वाची भूमिका बजावली आहे.
लॉयड्स मेटल्स अँड एनर्जी लिमिटेडचे व्यवस्थापकीय संचालक श्री. बी. प्रभाकरन यांच्या “सर्वांसाठी सुलभ व गुणवत्तापूर्ण आरोग्यसेवा” या दृष्टीकोनातून ही सेवा विकसित झाली आहे. तसेच लॉयड्स इन्फिनिट फाउंडेशनच्या संचालिका सौ. कीर्ती रेड्डी यांच्या मार्गदर्शनाखाली रुग्णकेंद्रित व संवेदनशील सेवांवर विशेष भर दिला जात आहे.
अत्याधुनिक सुविधा आणि कुशल तज्ज्ञांच्या जोरावर एलकेएएम रुग्णालय ग्रामीण भारतातील मातृत्व सेवांसाठी आशेचा किरण ठरत आहे. वेदनारहित प्रसूती आणि ४०० सुरक्षित जन्मांचा टप्पा ही समर्पित आरोग्यसेवेची ठोस साक्ष असून, दुर्गम भागातही सुरक्षित मातृत्व शक्य असल्याचा विश्वास दृढ करत आहे.
