जंगल वाचवणाऱ्या योद्ध्याचा सन्मान : कुरखेडातील वनरक्षक मुकेश सयाम यांना राज्यस्तरीय रजत पदक
The गडविश्व
ता. प्र/कुरखेडा (चेतन गहाणे), दि. २५ : दुर्गम जंगलात जीव धोक्यात घालून वनसंपत्ती व वन्यजीवांचे रक्षण करणाऱ्या कुरखेडा तालुक्यात कार्यरत असलेले वनरक्षक मुकेश सयाम यांना महाराष्ट्र राज्य वन विभागामार्फत राज्यस्तरीय रजत पदक जाहीर करण्यात आले आहे. त्यांच्या या उल्लेखनीय यशामुळे गडचिरोली जिल्ह्याचा मान उंचावला असून सर्वत्र त्यांचे कौतुक होत आहे.
कुरखेडा तालुक्यातील उराडी येथील रहिवासी असलेले मुकेश सयाम सध्या चारभट्टी येथे वनरक्षक म्हणून कार्यरत आहेत. सेवाकाळात त्यांनी जंगल संरक्षण, वन्यजीव संवर्धन तसेच अवैध वृक्षतोड आणि वन गुन्ह्यांवर प्रभावी नियंत्रण ठेवत उल्लेखनीय कामगिरी बजावली आहे. विशेषतः संवेदनशील आणि दुर्गम भागात कार्य करताना त्यांनी दाखवलेली तत्परता, धैर्य आणि कर्तव्यनिष्ठा यामुळे वन विभागाच्या कार्याला बळकटी मिळाली आहे.
वनसंपत्तीचे रक्षण करताना त्यांनी अनेकवेळा जीवाची पर्वा न करता कार्य केले असून, त्यांच्या सतर्कतेमुळे मोठ्या प्रमाणावर होणारी जंगलतोड रोखण्यात यश आले आहे. यासोबतच स्थानिक नागरिकांमध्ये वनसंरक्षणाबाबत जागृती निर्माण करण्यासाठी त्यांनी विविध उपक्रम राबवले. गावकऱ्यांना वनसंवर्धनाच्या कामात सहभागी करून घेतल्याने वन विभाग आणि ग्रामस्थ यांच्यातील समन्वय अधिक दृढ झाला आहे.
वन विभागाच्या वरिष्ठ अधिकाऱ्यांनी त्यांच्या या कार्याचे कौतुक करताना, “मुकेश सयाम यांसारखे कर्तव्यदक्ष व समर्पित कर्मचारी वनसंरक्षणासाठी प्रेरणादायी ठरत आहेत. त्यांच्या कामगिरीमुळे विभागाची प्रतिमा उंचावली आहे,” असे मत व्यक्त केले.
दरम्यान, या सन्मानाबद्दल प्रतिक्रिया देताना मुकेश सयाम यांनी आपल्या यशाचे श्रेय कुटुंबीय, सहकारी कर्मचारी आणि गावकऱ्यांना दिले. “वनसंरक्षण ही केवळ नोकरी नसून एक जबाबदारी आहे. पुढील काळातही जंगल व वन्यजीवांच्या रक्षणासाठी अधिक जोमाने काम करत राहीन,” अशी भावना त्यांनी व्यक्त केली.
या यशाबद्दल परिसरातील नागरिक, मित्रपरिवार आणि विविध सामाजिक संघटनांकडून त्यांच्यावर अभिनंदनाचा वर्षाव होत असून, तरुण पिढीसाठी ते प्रेरणास्थान ठरत आहेत.
#thegdv #thegadvishva #gadchirolinews #gadchirolipolice #ForestHero #MukeshSayam #ForestDepartment #WildlifeProtection #ForestConservation #SilverMedal #StateAward #Gadchiroli #KurKheda #ProudMoment #BraveryInDuty #EnvironmentalHero #SaveForests #RealHero #Inspiration
