कमलापूरात वन्यजीव संरक्षणाला वेग ; लॉयड्स मेटल्सकडून ३० कर्मचाऱ्यांना फील्ड किट्स
The गडविश्व
सिरोंचा, दि. १९ : गडचिरोली जिल्ह्यातील वन्यजीव संरक्षण अधिक सक्षम करण्याच्या उद्देशाने लॉयड्स मेटल्स अँड एनर्जी लिमिटेडतर्फे सिरोंचा वन विभागातील कमलापूर हत्ती छावणीत अग्रिम पथकांना फील्ड किट्स प्रदान करण्यात आले. वनविभाग व कंपनीच्या समन्वयातून हा उपक्रम यशस्वीरित्या पार पडला.
कार्यक्रमाचे उद्घाटन उपवनसंरक्षक (DCF) नवकिशोर रेड्डी आणि सहाय्यक वनसंरक्षक (ACF) विष्णु वर्धन रेड्डी यांच्या हस्ते झाले. यावेळी वनपरिक्षेत्र अधिकारी (RFO) गौतम गाडमाडे, परिविक्षाधीन RFO अनिरुष माने तसेच कमलापूर परिक्षेत्रातील वन कर्मचारी उपस्थित होते.
कमलापूर हत्ती छावणी, वन्य म्हैस संवर्धन पथक आणि “वल्चर फ्रेंड्स” उपक्रमाशी संबंधित पथकांना या वेळी फील्ड किट्सचे वितरण करण्यात आले. किट्समध्ये टी-शर्ट, ट्राउझर्स, ट्रेकिंग शूज, टॉर्च तसेच कॅम्पिंग तंबूंचा समावेश असून, यामुळे क्षेत्रीय कामकाज अधिक सुरक्षित व परिणामकारक होण्यास मदत होणार आहे. एकूण ३० अग्रिम कर्मचाऱ्यांना या उपक्रमाचा लाभ झाला.
उपवनसंरक्षक नवकिशोर रेड्डी यांनी कमलापूर हत्ती छावणीतील नियोजित सुधारणा तसेच मुदुमलाई व्याघ्र प्रकल्पाच्या मार्गदर्शनाखाली करण्यात आलेल्या कामांचा आढावा घेतला. लॉयड्स मेटल्स अँड एनर्जी लिमिटेडकडून मिळणाऱ्या तांत्रिक व लॉजिस्टिक सहाय्याबद्दल त्यांनी समाधान व्यक्त करत या साहित्यामुळे वन कर्मचाऱ्यांच्या दैनंदिन कार्यात सुलभता निर्माण होईल, असे नमूद केले.
कार्यक्रमाचा समारोप सहाय्यक वनसंरक्षक विष्णु वर्धन रेड्डी, वनपरिक्षेत्र अधिकारी गौतम गाडमाडे आणि परिविक्षाधीन RFO अनिरुष माने यांच्या समारोपपर भाषणांनी झाला.
लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरन यांच्या नेतृत्वाखाली राबविण्यात आलेला हा उपक्रम वन्यजीव संरक्षण व अधिवास व्यवस्थापन अधिक प्रभावी करण्यासाठी अग्रिम पथकांची क्षमता वाढविण्याच्या कंपनीच्या बांधिलकीचे प्रतीक ठरत आहे.
