४ लाख ६० हजारांचा मोहफुलाचा सडवा नष्ट

155

– ६ अड्डे उध्वस्त : कुकडी वासियांची कृती
The गडविश्व
गडचिरोली : आरमोरी तालुक्यातील कुकडी जंगलपरिसरात लावलेले सहा दारू अड्डे उध्वस्त करीत जवळपास ४ लाख ६० हजारांचा मोहफुलाचा सडवा नष्ट केल्याची कृती कुकडी गावातील नागरिकांनी बुधवारी केली. विशेष, म्हणजे ८० टक्के विक्रेते असणाऱ्या गावाने अवैध दारूविक्री बंद करण्याचा निर्णय घेऊन अंमलबजावणी सुरु केली आहे. त्यामुळे या गावाचे कौतुक केले जात आहे.
अवैध दारूविक्रीमुळे गावाचे होणारे नुकसान टाळण्यासाठी काही दिवसांपूर्वी दारूबंदी समिती गठीत करण्यात आली. तसेच ग्रामसभेचे आयोजन करून अवैध दारूविक्री बंद करण्याचा ठराव घेण्यात आला. ग्रामसभेच्या नियमांचे उल्लंघन करून आपला अवैध व्यवसाय सुरूच ठेवल्यास त्या व्यक्तीस शासकीय योजना, प्रमाणपत्रांपासून वंचित ठेवण्याचे ठरविण्यात आले. वारंवार नियमांचे उल्लंघन करून गावात सिंधी, ताळी, दारू विक्री केल्यास ठरावानुसार त्याचे नाव निष्काशीत करण्याचे ठरविण्यात आले होते. बाहेर गावाहून दारू पिवून कोणताही व्यक्ती गावात झगडे-भांडण केल्यास त्या व्यक्तीवर ५०० रुपये दंड  ठोठावण्याचा निर्णय सुद्धा घेण्यात आला होता. आताच्या घडीला गावाने या निर्णयाची अंमलबजावणी सुरु केली असून सध्या अवैध दारूविक्री बंद आहे. तसेच शेजारील गावातील काही विक्रेत्यांनी जंगलपरिसरात मोठ्या प्रमाणात मोहफुलाचा सडवा टाकला असल्याची माहिती मिळताच गावकऱ्यांनी अहिंसक कृती करण्याचा निर्णय घेतला. गावातील ४० स्वयंसेवकांनी जंगलपरिसरात जवळपास तीन किमी शोधमोहीम राबविली. दरम्यान, आढळून आलेले सहा अड्डे उध्वस्त करण्यात आले. तसेच जवळपास ४ लाख ६० हजार रुपये किंमतीचा १४८० किलो मोहफुलाचा सडवा व साहित्य नष्ट करण्यात आले. ही कृती कुकडी गावाने केल्याने चर्चेचा विषय ठरला आहे. पूर्वी या गावातील ८० टक्के लोक विक्री करीत होते. आता मात्र गावात एकही विक्रेता नाही. त्यामुळे इतर गावांनीही याचा आदर्श घेऊन आपापल्या गावाला दारूमुक्त व व्यसनमुक्त करावेत, असे आवाहन मुक्तीपथ तालुका संघटिका भारती उपाध्ये यांनी केले आहे.

LEAVE A REPLY

Please enter your comment!
Please enter your name here