– ०२ लाख रूपयांचे बक्षिस होते जाहीर
The गडविश्व
गडचिरोली, ०२ : नक्षल्यांच्या पीएलजीए सप्ताह २ डिसेंबर पासून सुरु आहे. दरम्यान विविध चकमक, दरोडा, खुनात प्रत्यक्ष सहभाग असलेल्या जहाल महिला नक्षली तारा ऊर्फ शारदा ऊर्फ ज्योती दस्सा कुळमेथे, वय 28 वर्ष, रा. नैनेर, ता. अहेरी, जि. गडचिरोली हिने २ डिसेंबर रोजी गडचिरोली पोलीस दल व सिआरपीएफ समोर आत्मसमर्पण केले.
शासनाने २००५ पासून जाहिर केलेल्या आत्मसमर्पण योजनेमुळे तसेच हिंसाचाराच्या जीवनाला कंटाळून वरिष्ठ नक्षल्यांसह अनेक जहाल नक्षली आजपर्यंत पोलीसांसमोर आत्मसमर्पण केलेले आहे.त्याचबरोबर आत्मसमर्पित नक्षल्यांचे पोलीस दलाने पुनर्वसन घडवून आणल्यामुळे आजपर्यंत एकुण ६७९ नक्षल्यांनी गडचिरोली पोलीस दलासमोर आत्मसमर्पण केले आहे.
तारा ऊर्फ शारदा ऊर्फ ज्योती दस्सा कुळमेथे हि २०१६ मध्ये अहेरी दलममध्ये सदस्य पदावर भरती होऊन २०१८ पर्यंत कार्यरत होती. २०१८ पासुन आजपर्यंत भामरागड दलममध्ये कार्यरत होती. २०१६ च्या कवठाराम, २०१७ च्या शेडा-किष्टापुर, आशा-नैनेर, २०१९ च्या मोरमेट्टा, २०२० च्या आलदंडी, येरदळमी, २०२१ च्या काकुर माड एरिया (छ.ग.), २०२३ च्या हिक्केर जंगल जंगल परिसरात सुरक्षादलासोबत झालेल्या चकमकीमध्ये प्रत्यक्ष सहभाग होता.
२०२१ मध्ये कोठी, २०२३ मध्ये मिळदापल्ली, २०२४ मध्ये ताडगाव येथील एका निरपराध इसमाच्या खुनामध्ये तिचा प्रत्यक्ष सहभाग होता. तसेच २०२२ मध्ये कापेवंचा राजाराम (खां) येथे दरोडामध्ये तिचा प्रत्यक्ष सहभाग होता. महाराष्ट्र शासनाने हिचेवर ०२ लाख रूपयाचे बक्षिस जाहिर केले होते.आत्मसमर्पणानंतर पुनर्वसनाकरीता केंद्र व राज्य शासनाकडुन तारा ऊर्फ शारदा ऊर्फ ज्योती दस्सा कुळमेथे हिला एकुण ४.५ लाख रुपये बक्षिस जाहिर केले आहे.
हि आहेत आत्मसमर्पित होण्याची कारणे
– नक्षल दलममध्ये अहोरात्र भटकंतीचे जीवन असल्यामुळे स्वत:च्या आरोग्याविषयी समस्या उद्भवल्यास त्याकडे काळजीपुर्वक लक्ष दिल्या जात नाही.
– माओवादी दलममधील जेष्ठ माओवाद्यांकडुन स्त्रीयांना भेदभावजनक वागणूक दिली जाते.
– दलममधील वरिष्ठ कॅडरचे माओवादी सांगतात की, चळवळीकरीता/जनतेकरीता पैसे गोळा करावे. प्रत्यक्षात गोळा केलेला पैसा ते स्वत:साठीच वापरतात. जनतेच्या विकासासाठी हा पैसा कधीच वापरल्या जात नाही.
– वरीष्ठ माओवादी नेते फक्त स्वत:च्या फायद्यासाठी गरीब आदिवासी युवक-युवतींचा वापर करून घेतात.
– खबरी असल्याच्या फक्त संशयावरून आमच्याच बांधवांना ठार मारायला सांगतात.
– चकमकीदरम्यान पुरुष माओवादी पळून जाण्यात यशस्वी होतात, मात्र महिला यात ठार मारल्या जातात.
गडचिरोली पोलीस दलाने अतिशय प्रभावीपणे माओवादविरोधी अभियान राबविल्यामुळे तसेच शासनाने माओवाद्यांना आत्मसमर्पणाची सुवर्णसंधी उपलब्ध करून दिल्याने, सन्मानाने जीवन जगण्यासाठी २०२२ ते आतापर्यंत एकुण ३१ जहाल माओवाद्यांनी आत्मसमर्पण केले आहे. सदर माओवाद्याचे आत्मसमर्पण घडवून मुख्यप्रवाहात आणण्याबाबतची कारवाई संदिप पाटील, विशेष पोलीस महानिरीक्षक (नक्षलविरोधी अभियान) नागपूर, अंकित गोयल, पोलीस उप-महानिरीक्षक गडचिरोली परिक्षेत्र, अजय कुमार शर्मा पोलीस उपमहानिरीक्षक (अभियान) सीआरपीएफ नीलोत्पल, पोलीस अधीक्षक गडचिरोली, शंभु कुमार, कमांडण्ट 09 बटा. सिआरपीएफ व सुमीत वर्मा, उप-कमांडण्ट इंट सिआरपीएफ यांच्या मार्गदर्शनाखाली पार पाडली. यावेळी पोलीस अधीक्षक गडचिरोली नीलोत्पल यांनी आवाहन केले की, विकासकामांना आडकाठी निर्माण करणाया माओवाद्यांवर पोलीस दल सक्षमपणे कारवाई करण्यास तत्पर असुन, जे माओवादी विकासाच्या प्रवाहात सामील होण्यास ईच्छुक असतील त्यांना विकासाच्या मुख्य प्रवाहात आणण्यासाठी तसेच लोकशाहीतील सन्मानाचे जीवन जगण्यासाठी गडचिरोली पोलीस दल सर्वतोपरी मदत करेल, तसेच त्यांनी हिंसेचा त्याग करुन शांततेचा मार्ग स्विकारावा.
