चुरशीच्या लढतीनंतर लॉयड्स व्हॉलीबॉल संघ उपविजेता

चुरशीच्या लढतीनंतर लॉयड्स व्हॉलीबॉल संघ उपविजेता
– अहेरी स्पर्धेत चमकदार कामगिरी
The गडविश्व
अहेरी, दि. ३० : अहेरी येथे 22 ते 26 जानेवारी 2026 या कालावधीत पार पडलेल्या राज्यस्तरीय व्हॉलीबॉल स्पर्धेत लॉयड्स व्हॉलीबॉल संघाने सातत्यपूर्ण आणि शिस्तबद्ध खेळाचे प्रदर्शन करत उपविजेतेपद पटकावले. महाराष्ट्रातील विविध भागांतील बलाढ्य संघांविरुद्ध झालेल्या चुरशीच्या सामन्यांत लॉयड्स संघाने उत्कृष्ट कामगिरी करत अंतिम फेरी गाठली.
पाच दिवस चाललेल्या या स्पर्धेत राज्यभरातील एकूण 16 नामांकित संघांनी सहभाग घेतला होता. त्यामुळे स्पर्धेचा दर्जा, चुरस आणि क्रीडाभावना प्रकर्षाने दिसून आली. अंतिम सामन्यात नागपूरच्या ऑरेंज सिटी संघाने प्रभावी खेळ साकारत विजेतेपद मिळवले, तर लॉयड्स संघ उपविजेता ठरला. या यशाबद्दल लॉयड्स संघाला 55,000 रुपयांचे रोख पारितोषिक प्रदान करण्यात आले.
संपूर्ण स्पर्धेदरम्यान लॉयड्स संघाने उत्कृष्ट सांघिक समन्वय, शिस्तबद्ध खेळ आणि लढाऊ वृत्तीचे दर्शन घडवले. चंद्रपूर, WSF वरोरा, चंद्रपूर सिटी, गोंडपिपरी, आम्रपाली, अल्लापल्ली यांच्यासह राज्यातील अनेक स्पर्धात्मक संघांनी या स्पर्धेत सहभाग घेतल्याने सामने अधिक रंगतदार झाले.
या स्पर्धेला शाहीन भाभीजी हकीम (महिला राष्ट्रीय कार्यकारिणी सदस्या) तसेच भाग्यश्री अत्राम (जिल्हा परिषद अध्यक्षा, गडचिरोली) यांची प्रमुख उपस्थिती लाभली. त्यांनी खेळाडूंना शुभेच्छा देत त्यांच्या क्रीडाप्रतिभेचे कौतुक केले.
लॉयड्स व्हॉलीबॉल संघाचे हे यश लॉयड्स स्पोर्ट्स अकादमीच्या सातत्यपूर्ण प्रयत्नांचे फलित असल्याचे मानले जात आहे. ही अकादमी लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरन यांच्या संकल्पनेतून साकार झाली आहे. या यशाबद्दल प्रभाकरन यांनी संघाचे अभिनंदन करत भविष्यातही विविध क्रीडा स्पर्धांमध्ये सातत्याने सहभाग घेण्याचे आवाहन केले.
स्थानिक खेळाडूंना संरचित प्रशिक्षण व स्पर्धात्मक व्यासपीठ उपलब्ध करून देणाऱ्या लॉयड्स स्पोर्ट्स अकादमीने गेल्या काही वर्षांत जिल्हा व राज्यस्तरीय स्पर्धांमध्ये उल्लेखनीय कामगिरी करणारे अनेक खेळाडू घडवले असून, त्यामुळे परिसरातील क्रीडा संस्कृतीला मोठी चालना मिळाली आहे.
या राज्यस्तरीय स्पर्धेचे यशस्वी आयोजन भाग्यश्रीताई अत्राम फॅन्स क्लब, अहेरी यांच्या वतीने करण्यात आले. क्रीडा उत्कृष्टता, उत्साह आणि सामाजिक सहभागाच्या सकारात्मक वातावरणात या स्पर्धेचा समारोप झाला.