रुग्णवाहिका पाहताच आंदोलन थांबवले ; वेगळा विदर्भ आंदोलकांचा मानवीय आदर्श
– पुराडा येथे रस्ता रोकोदरम्यान आपत्कालीन सेवेला दिला प्राधान्य
The गडविश्व
कुरखेडा, दि. १२ : वेगळा विदर्भ राज्याच्या मागणीसाठी पुराडा येथे सुरू असलेल्या रस्ता रोको आंदोलनादरम्यान आंदोलकांनी दाखवलेली मानवीय संवेदनशीलता आज एक आदर्श ठरली. कुरखेडा–कोरची मार्गावरील (छत्तीसगडला जोडणारा महत्त्वाचा महामार्ग) या आंदोलनात अचानक रुग्णवाहिका आल्याची माहिती मिळताच आंदोलकांनी क्षणाचाही विलंब न करता आंदोलन थांबवले आणि तातडीने रस्ता मोकळा करून रुग्णवाहिकेला मार्ग दिला.
वर्षानुवर्षे वेगळा विदर्भ राज्याच्या निर्मितीची मागणी जोरदारपणे पुढे रेटणाऱ्या आंदोलनकर्त्यांनी आपल्या हक्कांसाठी ठाम भूमिका घेतली असली, तरी आपत्कालीन सेवांना प्राधान्य देण्याची त्यांची मानवी भावना यावेळी प्रकर्षाने उजळून आली. आम्ही आमच्या अधिकारांसाठी लढतो आहोत, परंतु जीव वाचवणारी सेवा कधीही अडवणार नाही. रुग्णवाहिका दिसताच आम्ही नेहमीच रस्ता मोकळा करतो, असे एक आंदोलनकर्ते म्हणाले.
या संवेदनशील कृतीने आंदोलनाच्या शांतताप्रिय व जबाबदार स्वरूपाला बळ मिळाले असून स्थानिक पोलिसांनी देखील संपूर्ण आंदोलन शांततेत पार पडल्याचे सांगितले. छत्तीसगडला जोडणाऱ्या या महत्त्वाच्या मार्गावर आंदोलकांनी दाखवलेला मानवीय दृष्टिकोन सर्वत्र कौतुकाचा विषय ठरत आहे. वेगळा विदर्भ आंदोलन विकास, स्वायत्तता आणि प्रादेशिक न्यायाच्या मुद्द्यांवर केंद्रीत असले तरी अशा घटनांमुळे त्याची सकारात्मक, संवेदनशील आणि जनहिताला प्राधान्य देणारी बाजू ठरते.
