एमएमसी झोनमधील शेकडो नक्षली १ जानेवारीला शरण येणार ; अनंतची खुली घोषणा

एमएमसी झोनमधील शेकडो नक्षली १ जानेवारीला शरण येणार ; अनंतची खुली घोषणा
– सरकारकडे ऑपरेशन्स स्थगित करण्याची मागणी
The गडविश्व
गडचिरोली/विशेष प्रतिनिधी, दि. २८ : मध्य प्रदेश–महाराष्ट्र–छत्तीसगड (एमएमसी) विशेष क्षेत्रीय समितीचे प्रवक्ता अनंत यांनी तिन्ही राज्यांच्या मुख्यमंत्र्यांना उद्देशून दिलेल्या पत्राद्वारे अत्यंत महत्त्वाची घोषणा केली आहे. एमएमसीच्या सर्व गटांनी १ जानेवारी २०२६ रोजी सामूहिकरित्या शस्त्रे खाली ठेवून आणि सरकारच्या पुनर्वसन योजनांचा स्वीकार करून मुख्य प्रवाहात परतण्याचा निर्णय घेतल्याची माहिती अनंत यांनी दिली.
या प्रक्रियेच्या पार्श्वभूमीवर, त्यांनी महाराष्ट्र, मध्य प्रदेश आणि छत्तीसगड राज्य सरकारांना आवाहन केले आहे की त्या तारखेपर्यंत सर्व सुरक्षा कारवाया पूर्णपणे थांबवाव्यात. चकमक, अटक, शोधमोहीम किंवा नक्षलविरोधी कोणतीही हालचाल थांबवली नाही तर संपूर्ण संपर्क प्रक्रियेवर परिणाम होईल, असेही त्यांनी स्पष्ट केले. “आम्ही आम्हाला शक्य तितक्या मोठ्या संख्येने एकत्र आणण्याचा प्रयत्न करत आहोत. सुरक्षा दलांच्या कारवाया सुरू राहिल्यास ही प्रक्रिया अडखळेल,” असे अनंत यांनी म्हटले.अनंत यांच्या मते, कोणत्या राज्यात एमएमसी गट आपली शस्त्रे सोपवेल हे त्या राज्याच्या सरकारच्या भूमिकेवर अवलंबून असेल. पुढील एक महिना संपूर्ण प्रक्रिया शांततेत पूर्ण करण्यासाठी जे राज्य जास्त सहकार्य करेल, त्याच राज्याच्या मुख्यमंत्री किंवा गृहमंत्र्यांकडे शस्त्रे सोपवण्यास त्यांना प्राधान्य असेल. छत्तीसगडमध्ये सतीश दादा आणि महाराष्ट्रात सोनू दादा यांच्या प्रकरणात जसे शांततेत आत्मसमर्पण झाले, त्याप्रमाणेच प्रक्रिया करण्याची एमएमसीची इच्छा असल्याचेही अनंत यांनी नमूद केले.
छत्तीसगडचे गृहमंत्री विजय शर्मा यांच्या प्रतिसादाचे विशेष कौतुक करताना अनंत म्हणाले की, “त्यांनी १०–१५ दिवस पुरेसे असतील असे सांगितले, हा प्रतिसाद आश्वासक आहे. मात्र १ जानेवारी ही आमची ठरलेली तारीख असून ती कायम राहील. सरकारने या तारखेला कोणताही आक्षेप नसावा.” शर्मा यांनी ‘ठोस प्रस्ताव आणि मागण्या असल्यास सरकार त्यावर विचार करेल’ असे जाहीर केले होते. याबाबत अनंत यांनी आभार मानत सांगितले की, एमएमसीकडून शरणागतीपूर्वी किंवा नंतर प्रस्तावांची स्वतंत्र प्रेस नोट प्रसिद्ध केली जाईल.
याउलट, महाराष्ट्र आणि मध्य प्रदेश सरकारांकडून अद्याप असा आश्वासक प्रतिसाद मिळालेला नसल्याचे अनंत यांनी नमूद केले असून, दोन्ही राज्यांकडूनही सकारात्मक संकेत मिळावेत ही अपेक्षा व्यक्त केली.
या पत्रात एमएमसी प्रवक्त्याने झोनमधील सर्व नक्षलवाद्यांना स्पष्ट आदेश दिले आहेत की, या संपूर्ण प्रक्रियेला गती मिळेपर्यंत सर्व उपक्रम थांबवावेत. कोणत्याही आवेगात किंवा हिंसक कृतीत सहभागी होऊ नये आणि चालू वर्षी पीएलजीए सप्ताह साजरा केला जाणार नाही. संपर्क प्रक्रिया सुरळीत राहावी यासाठी एमएमसीने बाओफेंगची ओपन फ्रिक्वेन्सी ४३५.७१५ देखील जारी केली आहे.
शेवटी अनंत यांनी झोनमधील सर्व कॉम्रेड्सना संदेश दिला की, “आम्ही वैयक्तिकरित्या शरण येणार नाही. आम्ही सर्वजण एकत्र येऊन मुख्य प्रवाहात परतणार आहोत. ही शरणागती नाही… ही पुनममार्गम – म्हणजे पुनर्वसनाची दिशा आहे.”
एमएमसीच्या या पत्रामुळे तिन्ही राज्यांच्या सुरक्षा यंत्रणांमध्ये खळबळ उडाली असून, १ जानेवारी २०२६ रोजी मोठ्या प्रमाणावर नक्षलवाद्यांचे सामूहिक आत्मसमर्पण होण्याची शक्यता प्रबळ झाली आहे.

#thegdv #thegadvishva #gadchirolinews #gadchirolipolice #NaxalSurrender #MMCZone #Gadchiroli #MaoistMovement #SecurityForces #Rehabilitation #AnantStatement #Chhattisgarh #Maharashtra #MadhyaPradesh #SurrenderAppeal #PLGA #NaxalPeaceProcess #BreakingNews #ExclusiveReport

tere ishq mein, aan paavam pollathathu, europa league,saraayah meaning,black friday sale 2025