– आम आदमी पार्टीची निवेदनातून कारवाईची मागणी
The गडविश्व
ता. प्र / कुरखेडा, दि. २३ : कुरखेडा नगरपंचायतीच्या ५५ वर्षे जुनी प्रशासकीय इमारत धोकादायक अवस्थेत असल्याबाबत आम आदमी पार्टीने (AAP) तातडीच्या संरचनात्मक तपासणीची मागणी केली आहे. जिल्हा कोषाध्यक्ष इरफान पठाण यांच्या नेतृत्वाखालील आप कार्यकर्त्यांनी आज नगरपंचायतीचे मुख्याधिकारी राजकुमार धनबाते यांना निवेदन सादर केले. या इमारतीत भेगा पडणे, स्लॅबचा काँक्रीट गळणे यासारख्या गंभीर समस्या असल्याने कर्मचारी आणि नागरिकांच्या जीविताला धोका निर्माण झाला असल्याचे निवेदनात नमूद केले आहे.
निवेदनात म्हटले आहे की, ही इमारत १९७० मध्ये बांधली गेली असून, केवळ रंगरंगोटी करून ती वापरली जात आहे, ज्यामुळे संरचनात्मक कमकुवतपणा वाढत आहे. महाराष्ट्र नगरपरिषद, नगरपंचायती आणि औद्योगिक टाउनशिप अधिनियम, १९६५ (कलम १७९) आणि UDCPR 2020 (नियम ६.१०) अंतर्गत ही इमारत C-1 श्रेणीतील धोकादायक मानली जाऊ शकते. आप ने तातडीने सिव्हिल इंजिनिअर किंवा तांत्रिक समितीमार्फत संरचनात्मक ऑडिट (Structural Audit) करण्याची, अहवालानुसार दुरुस्ती किंवा पाडकामाची कारवाई करण्याची आणि प्रत्यक्ष वापर मर्यादित करण्याची मागणी केली आहे. यासाठी PWD किंवा जिल्हा प्रशासनाशी समन्वय साधावा आणि राज्य सरकारच्या इमारत दुरुस्ती निधीचा लाभ घ्यावा, असेही सुचवले आहे.
या प्रसंगी आप चे जिल्हा उपाध्यक्ष राजू मडावी, सचिव अमृत मेहेर, जिल्हा कामगार आघाडी प्रमुख साईनाथ कोंडावार, संघटक ताहिर शेख, सहसंघटक चेतन गहाणे, सोशल मीडिया प्रमुख अतुल सिंदराम आणि सदस्य अंकुश मडावी प्रामुख्याने उपस्थित होते. इरफान पठाण यांनी सांगितले की, “सार्वजनिक सुरक्षिततेसाठी ही कारवाई अपरिहार्य आहे. आम आदमी पार्टी नेहमीच नागरिकांच्या हक्कांसाठी लढते आणि प्रशासनाला जबाबदार ठेवते.” मुख्याधिकारी राजकुमार धनबाते यांनी निवेदनाची दखल घेतली असून, लवकरच तपासणी समिती गठित करण्याचे आश्वासन दिले आहे.
आप च्या या उपक्रमाने कुरखेडा शहरात सकारात्मक चर्चा सुरू झाली असून, नागरिकांकडूनही इमारतीच्या सुरक्षिततेसंबंधी जागृती वाढत आहे.
#thegdv #thegadvishva #gadchirolipolice #gadchirolinews #kurkhedanews
