The गडविश्व
गडचिरोली, दि. ०३ : राज्यात महिला सुरक्षेबाबतचा प्रश्न ऐरणीवर असताना गडचिरोली जिल्ह्यातही महिला सुरक्षेचा प्रश्न ऐरणीवर आला आहे. जिल्ह्यातील एका गावातील शारीरिकदृष्ट्या कमकुवत असलेल्या तरुणीला अमानुष मारहाण मारहाण केल्याची घटना रात्रो उघडकीस आली असून अत्याचार झाल्याचा संशय व्यक्त करण्यात येत आहे. सदर तरुणीच्या डोळ्याखाली काळे व्रण, हाताला दुखापत असून तिच्यावर जिल्हा रुग्णालयात प्रथमोपचार करुन पुढील उपचारासाठी नागपूरला हलविण्यात आल्याची माहिती आहे.
शारीरिकदृष्ट्या कमकुवत असलेली २३ वर्षीय तरुणी हि काल २ मार्चला सायंकाळच्या सुमारास शौचासाठी गावालगत उघड्यावर गेली असता अधिक वेळ होऊनही ती परत न आल्याने तिचा शोध घेतला असता शौचास गेलेल्या ठिकाणापासून २० मीटर अंतरावर ती बेशुध्दावस्थेत आढळून आली. दरम्यान तिच्या हाताला जखमा व डोळ्याखाली काळे व्रण दिसून आले. तात्काळ ग्रामस्थांनी तिला जिल्हा रुग्णालयात दाखल केले. प्राथमिक उपचार करुन डॉक्टरांनी पुढील उपचारासाठी नागपूरला शासकीय रुग्णालयात रेफर केले. घटनेची माहिती मिळताच गडचिरोली ठाण्याचे पो.नि. रेवचंद सिंगनजुडे यांनी जिल्हा रुग्णालयात धाव घेत माहिती घेतली.
दरम्यान सदर घटनेने जिल्ह्यात खळबळ उडाली असून या घटनेतील आरोपींची संख्या किती आहे हे अद्याप सांगता येत नसली तरी पोलिसांनी सदर प्रकरणाचे गांभीर्य लक्षात घेता तपासाची चक्रे अधिक गतीने फिरविले आहे.
