गडचिरोलीत दोन जहाल माओवाद्यांचे आत्मसमर्पण

1019

– ०८ लाख रूपयांचे बक्षिस होते जाहीर
The गडविश्व
गडचिरोली , दि. २० : गडचिरोली पोलीस दल व सिआरपीएफ समोर शनिवार २० डिसेंबर रोजी दोन दोन जहाल माओवाद्यांनी आत्मसमर्पण केले आहे. रामसु दुर्गु पोयाम ऊर्फ नरसिंग (ए.सी.एम), (वय ५५ ), रा. गट्टानेली, ता. धानोरा, जि. गडचिरोली व रमेश शामु कुंजाम ऊर्फ गोविंद ऊर्फ रोहित (दलम सदस्य), ( वय २५ ), रा. वेडमेट्टा, जि. नारायणपूर (छ.ग.) असे आत्मसमर्पण केलेल्या जहाल माओवाद्यांचे नाव आहे.
शासनाने २००५ पासून जाहिर केलेल्या आत्मसमर्पण योजनेमुळे तसेच हिंसाचाराच्या जीवनाला कंटाळून वरिष्ठ माओवाद्यांसह अनेक जहाल माओवाद्यांनी आजपर्यंत पोलीसांसमोर आत्मसमर्पण केलेले आहे. त्याचबरोबर आत्मसमर्पित माओवाद्यांचे पोलीस दलाने पुनर्वसन घडवून आणल्यामुळे आजपर्यंत एकुण ६८० माओवाद्यांनी गडचिरोली पोलीस दलासमोर आत्मसमर्पण केले आहे.

रामसु दुर्गु पोयाम ऊर्फ नरसिंग हा १९९२ मध्ये टिपागड दलममध्ये सदस्य पदावर भरती होऊन १९९५ पर्यंत कार्यरत होता. १९९५ मध्ये काकुर दलममध्ये राहुन १९९६ पर्यंत माओवाद्यांच्या प्रशिक्षण कार्यक्रमांना सुरक्षा देण्याचे काम करीत होता. १९९६ ते १९९८ पर्यंत पुन्हा टिपागड दलममध्ये कार्यरत होता. १९९८ मध्ये माड एरीया (छ.ग.) येथे बदली होऊन सप्लाय टिममध्ये २००१ पर्यंत कार्यरत होता. २००१ ते २००२ पर्यंत प्रेस टिममध्ये प्रशिक्षणाकरीता कार्यरत होता. २००२ मध्ये एरीया कमिटी मेंबर (एसीएम) पदावर पदोन्नती होऊन माआवाद्यांसाठी कृषी कामाकरीता मौजा कोडतामर्का गाव परिसरात २००५ पर्यंत कार्यरत होता. २००५ ते २०१० या कालावधीत मौजा डुमनार, फरसगाव व कोडेनार या गावांमध्ये माओवाद्यांसाठी कृषीची कामे करत होता.२०१० ते आजपावेतो कुतुल आणि नेलनार दलममध्ये एरीया कमिटी मेंबर (एसीएम) पदावर कार्यरत होता. याच्यावर आजपर्यंत एकुण १२ गुन्हे दाखल असून त्यामध्ये ०६ चकमक, ०५ खुन, व ०१ दरोडा इ. गुन्ह्रांचा समावेश आहे.

रमेश शामु कुंजाम ऊर्फ गोविंद ऊर्फ रोहित हा २०१९ मध्ये मिलिशिया म्हणून माओवाद्यांची कामे करत होता.२०२० मध्ये चेतना नाट्य मंच (सिएनएम) येथे सदस्य पदावर भरती होऊन कार्यरत. २०२१ मध्ये कुतुल दलममध्ये सदस्य पदावर भरती होऊन आजपावेतो कार्यरत होता. हिंसक घटनांमध्ये त्याचा सहभाग असल्याची पडताळणी करणे सुरु आहे.
महाराष्ट्र शासनाने रामसु दुर्गु पोयाम ऊर्फ नरसिंग याच्यावर ०६ लाख तर रमेश शामु कुंजाम ऊर्फ गोविंद ऊर्फ रोहित याच्यावर ०२ लाख रूपयाचे बक्षिस जाहिर केले होते.
आत्मसमर्पणानंतर पुनर्वसनाकरीता केंद्र व राज्य शासनाकडुन रामसु दुर्गु पोयाम ऊर्फ नरसिंग याला एकुण ४.५ लाख रुपये तर रमेश शामु कुंजाम ऊर्फ गोविंद ऊर्फ रोहित याला एकुण ४.५ लाख रुपये बक्षिस जाहिर केले आहे.
गडचिरोली पोलीस दलाने अतिशय प्रभावीपणे माओवादविरोधी अभियान राबविल्यामुळे तसेच शासनाने माओवाद्यांना आत्मसमर्पणाची सुवर्णसंधी उपलब्ध करून दिल्याने, सन्मानाने जीवन जगण्यासाठी फक्त यावर्षात २० जहाल माओवाद्यांसह २०२२ ते आतापर्यंत एकुण ३३ जहाल माओवाद्यांनी आत्मसमर्पण केले आहे. सदर माओवाद्याचे आत्मसमर्पण घडवून मुख्यप्रवाहात आणण्याबाबतची कारवाई संदिप पाटील, विशेष पोलीस महानिरीक्षक (नक्षलविरोधी अभियान) नागपूर, अंकित गोयल, पोलीस उप-महानिरीक्षक गडचिरोली परिक्षेत्र, अजय कुमार शर्मा पोलीस उपमहानिरीक्षक (अभियान) सीआरपीएफ नीलोत्पल, पोलीस अधीक्षक गडचिरोली, सुजीत कुमार, प्रभारी समादेशक, ३७ बटा. सिआरपीएफ यांच्या मार्गदर्शनाखाली पार पाडली. यावेळी पोलीस अधीक्षक गडचिरोली नीलोत्पल यांनी आवाहन केले की, विकासकामांना आडकाठी निर्माण करणा­या माओवाद्यांवर पोलीस दल सक्षमपणे कारवाई करण्यास तत्पर असुन, जे माओवादी विकासाच्या प्रवाहात सामील होण्यास ईच्छुक असतील त्यांना विकासाच्या मुख्य प्रवाहात आणण्यासाठी तसेच लोकशाहीतील सन्मानाचे जीवन जगण्यासाठी गडचिरोली पोलीस दल सर्वतोपरी मदत करेल, तसेच त्यांनी हिंसेचा त्याग करुन शांततेचा मार्ग स्विकारावा.

LEAVE A REPLY

Please enter your comment!
Please enter your name here