– पोलिसांची २४ तासांत थरारक कारवाई
The गडविश्व
गडचिरोली, दि. २४ : सावरगाव–मुरुमगाव मार्गावर ट्रक चालकाला मध्यरात्री बंदुकीचा धाक दाखवत मोबाईल फोन लुटणाऱ्या चौघा आरोपींना गडचिरोली पोलिसांनी अवघ्या चोवीस तासांत अटक केली. या प्रकरणात देशी बनावटीच्या दोन बंदुका, अकरा जिवंत काडतुसे, चोरीस गेलेला मोबाईल फोन आणि गुन्ह्यात वापरलेली मोटारसायकल जप्त करण्यात आली आहे.
ट्रक चालक रामभरोस सिताराम हे २१ जुलै रोजी रात्री सुमारास ट्रक चिखलात अडकल्याने सावरगाव–मुरुमगाव मार्गावर ट्रकच्या कॅबिनमध्ये झोपले होते. त्यावेळी रात्री १.३० ते २.०० वाजण्याच्या दरम्यान तीन अज्ञात व्यक्तींनी त्यांना झोपेतून उठवले. बंदुकीचा धाक दाखवत त्यांनी डिझेल काढून देण्याची धमकी दिली. मात्र चालकाने नकार दिल्यामुळे आरोपींनी त्याच्या छातीवर व डोक्यावर बंदुका ठेवून धमकावत मोबाईल हिसकावून घेतला आणि जिवे ठार मारण्याची धमकी देत घटनास्थळावरून पसार झाले.
सदर घटनेनंतर फिर्यादीने मुरुमगाव पोलीस ठाण्यात तक्रार दाखल केली. या प्रकरणी भादंवि कलम 309(4), 311, 351(3) तसेच शस्त्र अधिनियम 1959 अंतर्गत गुन्हा दाखल करण्यात आला. गुन्ह्याचे गांभीर्य लक्षात घेता पोलीस अधीक्षक नीलोत्पल यांनी तातडीने तपासाचे आदेश दिले. पोलीस उपनिरीक्षक विश्वंभर कराळे यांच्या नेतृत्वाखालील सावरगाव पोलीस पथकाने तांत्रिक पुरावे आणि साक्षीदारांच्या जबाबांच्या आधारे मौजा गजामेंढी, ता. धानोरा येथून अशोक सुखराम बोगा (३०), घुमनसाय बैजुराम गावडे (३३) आणि सुकालु आसाराम कोमरा (३२) या तिघांना ताब्यात घेतले.
आरोपींनी पोलिसी चौकशीत गुन्ह्याची कबुली दिल्यानंतर गुन्ह्यात वापरलेली बंदुका छत्तीसगडमधून मिळाल्याचे स्पष्ट झाले. त्यानुसार बसंतकुमार कल्लो (४१, रा. नवागाव कोंडल, जि. कांकेर, छत्तीसगड) यालाही अटक करण्यात आली. चारही आरोपींना दिनांक २२ जुलै रोजी प्रथम वर्ग न्यायदंडाधिकारी, धानोरा यांच्या समोर हजर करण्यात आले असता, २६ जुलैपर्यंत पोलीस कोठडी सुनावण्यात आली आहे.
या कारवाईदरम्यान पोलिसांनी दोन देशी बनावटीच्या बंदुका, अकरा नग जिवंत काडतुसे, चोरीस गेलेला मोबाईल आणि गुन्ह्यात वापरलेली मोटारसायकल असा मुद्देमाल जप्त केला. गुन्ह्याचा पुढील तपास पोलीस उपनिरीक्षक विश्वंभर कराळे करत आहेत.
ही संपूर्ण कारवाई पोलीस अधीक्षक नीलोत्पल, अपर पोलीस अधीक्षक (अभियान) एम. रमेश, अपर पोलीस अधीक्षक (प्राणहिता विभाग) सत्य साई कार्तिक, अपर पोलीस अधीक्षक (प्रशासन) गोकुलराज जी. आणि उपविभागीय पोलीस अधिकारी, धानोरा जगदीश पांडे यांच्या मार्गदर्शनाखाली पार पडली. तपास पथकामध्ये पोलीस उपनिरीक्षक राजेंद्र कोळेकर, पोहवा वानखेडे, नापोअं तुलावी, पोअं काळबांधे, मपोअं श्रीरामे, तसेच पोलीस कर्मचारी लेकामी आणि करसायल यांनी सक्रिय सहभाग घेतला.
गडचिरोली पोलिसांची ही वेगवान व अचूक कारवाई जिल्ह्यातील कायदा व सुव्यवस्थेच्या दृष्टीने अत्यंत महत्वाची ठरली आहे.
#thegdv #thegadvishva #gadchirolinews #gadchirolipolice #गडचिरोली #पोलीसकारवाई #जबरीचोरी #GunCrime #CrimeNews #PoliceAction #LawAndOrder #MaharashtraNews #गुन्हेवार्ता #गडचिरोलीपोलीस #BreakingNews #MarathiNews #चोरी #Bandook #24तासांतअटक
