धक्कादायक : शेतालगत बॅगमध्ये आढळले नवजात बाळ
– बाळाची प्रकृती लक्षात घेता उपचारासाठी रुग्णालयात दाखल
The गडविश्व
भंडारा, दि. १४ : जिल्ह्यातील लाखनी पोलीस ठाण्यांतर्गत येत असलेल्या पिंपळगाव सडक परिसरात शेतजमिनीला लागून असलेल्या झाडाजवळ काळ्या रंगाच्या बॅगमध्ये नवजात बाळ आढळून आल्याची धक्कादायक घटना मंगळवारी (दि. १३) दुपारच्या सुमारास उघडकीस आली. या घटनेमुळे परिसरात एकच खळबळ उडाली असून माणुसकीवर प्रश्नचिन्ह उपस्थित झाले आहे.
मानेगाव सडक येथील शेतालगत असलेल्या झाडाजवळ ठेवलेली संशयास्पद बॅग काही नागरिकांच्या निदर्शनास आली. त्यांनी बॅग उघडून पाहिली असता त्यामध्ये अंदाजे ८ ते १० दिवसांचे स्त्री जातीचे नवजात बाळ आढळून आले. याबाबत तात्काळ माहिती लाखनी पोलिसांना देण्यात आली.
माहिती मिळताच लाखनी पोलीस ठाण्याचे पोलीस निरीक्षक सुभाष बारसे घटनास्थळी दाखल झाले. पोलिसांनी परिस्थितीचा पंचनामा करून नवजात बाळाला तातडीने ग्रामीण रुग्णालय, लाखनी येथे दाखल केले. प्राथमिक उपचारानंतर बाळाची प्रकृती लक्षात घेता पुढील उपचारासाठी जिल्हा सामान्य रुग्णालय, भंडारा येथे हलविण्यात आले आहे.
नवजात बाळाला अशा अवस्थेत शेतालगत बॅगमध्ये टाकून देण्यामागील कारण अद्याप स्पष्ट झालेले नाही. हे अमानुष कृत्य कोणी व कोणत्या परिस्थितीत केले, याचा शोध घेण्यासाठी लाखनी पोलिसांकडून तपासाची चक्रे वेगाने फिरविण्यात आली आहेत. परिसरातील सीसीटीव्ही फुटेज तपासण्यासह नागरिकांची चौकशी सुरू असून दोषींवर कठोर कारवाईची मागणी होत आहे.
#thegdv #thegadvishva #gadchirolinews #gadchirolipolice
