लोकं नाही तर गडचिरोलीचा विकास धावत आहे : सहपालकमंत्री ॲड. आशिष जयस्वाल

लोकं नाही तर गडचिरोलीचा विकास धावत आहे : सहपालकमंत्री ॲड. आशिष जयस्वाल
The गडविश्व
गडचिरोली, दि. २८ : आज केवळ नागरिक धावत नाहीत, तर गडचिरोलीचा विकास धावत आहे. गडचिरोलीकरांची जिद्द, सकारात्मक ऊर्जा आणि सहभाग ही जिल्ह्याचा कायापालट घडवून आणणारी शक्ती ठरणार असल्याचे गौरवपूर्ण प्रतिपादन राज्याचे वित्त, नियोजन, कृषी, मदत व पुनर्वसन, विधी व न्याय, कामगार राज्यमंत्री तथा गडचिरोली जिल्ह्याचे सहपालकमंत्री ॲड. आशिष जयस्वाल यांनी केले.
जिल्हा परिषद, गडचिरोलीच्या प्रांगणात पोलीस दलाच्या वतीने आयोजित ‘गडचिरोली महामॅरेथॉन’ कार्यक्रमात ते मुख्य अतिथी म्हणून बोलत होते. यावेळी अपर पोलीस महासंचालक (विशेष कृती) छेरींग दोरजे, नक्षलविरोधी अभियानाचे विशेष पोलीस महानिरीक्षक संदीप पाटील, जिल्हाधिकारी अविश्यांत पंडा, आमदार धर्मरावबाबा आत्राम, आमदार डॉ. मिलिंद नरोटे, उपमहानिरीक्षक अंकीत गोयल, जिल्हा पोलीस अधीक्षक निलोत्पल, केंद्रीय राखीव पोलीस दलाचे उपमहानिरीक्षक (परिचालन) अजय शर्मा, जिल्हा परिषदेचे मुख्य कार्यकारी अधिकारी सुहास गाडे, गोंडवाना विद्यापीठाचे कुलगुरू डॉ. प्रशांत बोकारे, लॉयड्स मेटल्स अ‍ॅण्ड एनर्जी लिमिटेडचे व्यवस्थापकीय संचालक बालसुब्रमण्यम प्रभाकरन तसेच अपर जिल्हाधिकारी नितीन गावंडे आदी मान्यवर उपस्थित होते.
मुख्यमंत्री देवेंद्र फडणवीस यांनी गडचिरोली महामॅरेथॉनसाठी शुभेच्छा दिल्याची माहिती देताना सहपालकमंत्री ॲड. जयस्वाल यांनी या भव्य आणि शिस्तबद्ध आयोजनाबद्दल पोलीस दलाचे विशेष कौतुक केले. गडचिरोली जिल्हा आता केवळ सुरक्षिततेपुरता मर्यादित न राहता आरोग्य, क्रीडा आणि सामाजिक सहभागाच्या माध्यमातून इतर जिल्ह्यांना प्रेरणा देणारे कार्य करत आहे, असेही त्यांनी नमूद केले.
या महामॅरेथॉनमध्ये जिल्ह्याच्या विविध भागांतून सुमारे १४ हजार नागरिकांनी उत्स्फूर्त सहभाग नोंदविला. २१ किलोमीटर, १० किलोमीटर, ५ किलोमीटर व ३ किलोमीटर अशा विविध अंतरांच्या शर्यती आयोजित करण्यात आल्या होत्या. नागरिक, युवक, विद्यार्थी, महिला तसेच पोलीस व सुरक्षा दलातील जवानांनी मोठ्या उत्साहात सहभाग घेत कार्यक्रम यशस्वी केला. मान्यवरांच्या हस्ते हिरवी झेंडी दाखवून महामॅरेथॉनला सुरुवात करण्यात आली. विशेष बाब म्हणजे, सहपालकमंत्री ॲड. जयस्वाल यांच्यासह उपस्थित वरिष्ठ अधिकारी व लोकप्रतिनिधींनी स्वतः धावून मॅरेथॉनमध्ये सहभाग नोंदविला.
२१ किलोमीटर मॅरेथॉनमध्ये महिलांच्या गटात साक्षी पोलादवार, तर पुरुषांच्या गटात रोशन बोदलवार यांनी प्रथम क्रमांक पटकावला. १० किलोमीटर मॅरेथॉनमध्ये महिलांच्या गटात मुन्नी मडावी, तर पुरुषांच्या गटात रोहन बुरसे यांनी प्रथम क्रमांक मिळविला. सर्व विजेत्यांना मान्यवरांच्या हस्ते प्रथम, द्वितीय व तृतीय क्रमांकाची पारितोषिके प्रदान करून गौरविण्यात आले.