राशन वाटपात सुस्तीला जिल्हाधिकाऱ्यांचा चाप : १०० टक्के धान्यवाटप अनिवार्य
The गडविश्व
गडचिरोली, दि. २८ : अन्नसुरक्षा योजनेंतर्गत पात्र लाभार्थ्यांना शंभर टक्के धान्यवाटप सुनिश्चित करण्याचे कडक निर्देश जिल्हाधिकारी अविश्यांत पंडा यांनी दिले आहेत. चामोर्शी तालुक्यातील येणापूर येथील रास्तभाव दुकानाच्या अचानक पाहणीत काही दुकानांत केवळ ५० टक्क्यांच्या आसपासच वितरण होत असल्याचे उघड झाल्यानंतर जिल्हाधिकाऱ्यांनी तीव्र नाराजी व्यक्त केली.
अचानक दौऱ्यात जिल्हा पुरवठा अधिकारी सुधाकर पवार यांच्या उपस्थितीत दुकानांतील धान्यवितरण नोंदी, वजन काटे, स्टॉक स्थिती, ई-पॉस व्यवहार आणि लाभार्थी यादीची बारकाईने तपासणी करण्यात आली. शासनाने नियुक्त केलेले धान्य वेळेवर आणि विनाविलंब लाभार्थ्यांकडे पोहोचले पाहिजे, यावर जिल्हाधिकाऱ्यांनी विशेष भर दिला.
कारभारात ढिलाई, अनियमितता किंवा तांत्रिक त्रुटी आढळल्यास संबंधितांवर कठोर कारवाई करण्यात येईल, असा स्पष्ट इशारा त्यांनी दिला.
जिल्हाधिकारी पंडा यांनी उपविभागीय अधिकारी आणि तहसीलदारांना विशेष पथके गठित करून सर्व दुकाने तातडीने तपासण्याचे आदेश दिले. लाभार्थ्यांना योग्य प्रमाणात धान्य मिळते आहे की नाही, स्टॉकची पडताळणी योग्य पद्धतीने होते आहे का, तसेच ई-पॉस मशीनवरील व्यवहार वास्तविक आहेत की नाही-याची सखोल पडताळणी करण्यास त्यांनी सांगितले.
धान्यवाटपात कोणत्याही प्रकारची फसवणूक, कपात किंवा गैरसोय होत असल्यास नागरिकांनी तात्काळ पुरवठा विभागाशी संपर्क साधावा, असे आवाहनही जिल्हाधिकाऱ्यांनी केले.
#thegdv #thegadvishva #gadchirolinews #gadchirolipolice
