– आठ – आठ लाखांचे बक्षीस होते जाहीर
– ७६ जवानांच्या हत्येसह अनेक घटनांमध्ये समावेश
The गडविश्व
सुकमा , ३ ऑगस्ट : ७६ जवानांच्या हत्येसह अनेक घटनांमध्ये समावेश असलेल्या नक्षल दाम्पत्याने सुकमा पोलिसांसमोर मंगळवारी आत्मसमर्पण केले आहे. सल्वम मुक्ता उर्फ सुकू असे आत्मसमर्पण केलेल्या पुरुष नक्षलीचे नाव असून सल्वम गंगी असे महिला नक्षलीचे नाव आहे. त्यांच्यावर शासनातर्फे आठ लाखांचे बक्षीस होते जाहीर होते.
हे दाम्पत्य दक्षिण बस्तर बटालियन क्रमांक १ मध्ये भयंकर आणि टॉप मोस्ट वाँटेड नक्षली हिडमामध्ये बराच काळ काम करत होते अशी माहिती आहे. यातील पुरुष नक्षली १६ वर्षे आणि महिला नक्षली १० वर्षे संघटनेत राहिले आणि सुकमा आणि विजापूर जिल्ह्यातील अनेक मोठ्या नक्षली घटनांमध्ये त्यांचा सहभाग होता. त्यानंतर बड्या नक्षली नेत्यांच्या छळाला कंटाळून आणि संघटनेची पोकळ विचारसरणी सोडून सरकारच्या मुख्य प्रवाहात सामील होण्यासाठी मंगळवारी सुकमा पोलिसांसमोर आत्मसमर्पण केले.
सुकमाचे एएसपी किरण चव्हाण यांनी सांगितले की, नक्षली दाम्पत्याच्या आत्मसमर्पणामुळे संस्थेचे मोठे नुकसान झाले आहे. सल्वम मुक्ता उर्फ सुकू हा गेल्या १६ वर्षांपासून नक्षल संघटनेत सहभागी होता. ताडमेटला येथे ७६ जवानांची हत्या, कसालपाडमध्ये जवानांना गोळीबार करून ठार मारणे तसेच पिडमेलमध्ये मोठी घटना घडवून आणणे, १४ हून अधिक मोठ्या नक्षली घटनांमध्ये सामील आहे. याशिवाय सुकूसह त्याची पत्नी सल्वम गंगी हिचाही या सर्व घटनांमध्ये सहभाग आहे. पोलिसांनी त्यांच्यावर आठ – आठ लाख रुपयांचे बक्षीस जाहीर केले होते.
मुक्ता उर्फ सुकू हा मोस्ट वाँटेड नक्षली हिडमाचा बंदूकधारीही होता. आत्मसमर्पण करण्यापूर्वी सुकू नक्षली संघटनेच्या प्लाटून क्रमांक एक, बटालियन क्रमांक एकचा डेप्युटी कमांडर आणि सेक्शन ए कमांडर होता. महिला नक्षली सल्वम गंगी २०१३ पासून नक्षल संघटनेत सामील होती आणि बटालियन क्रमांकाच्या कृषी पथकाची सदस्य होती. दोघांकडे एसएलआर रायफल होत्या. सुकमा, विजापूर आणि दंतेवाडामध्ये या नक्षलवादी दाम्पत्याची चांगलीच दहशत होती असेही एएसपी किरण चव्हाण यांनी सांगितले.
अनेक दिवसांपासून पोलिसांसमोर आत्मसमर्पण करण्याचा विचार करत होतो आणि त्यानंतर मंगळवारी आत्मसमर्पण करण्याचा निर्णय घेतला असे आत्मसमर्पित नक्षल दाम्पत्याने सांगितले. सध्या नक्षल्यांच्या आत्मसमर्पणानंतर पोलीस अधिकाऱ्यांनी आत्मसमर्पण केलेल्या दाम्पत्याला शासनाच्या पुनर्वसन धोरण योजनेंतर्गत १० हजार रुपये प्रोत्साहनपर अनुदान दिले असून लवकरच या दाम्पत्याला शासनाच्या इतर योजनांचा लाभही मिळणार आहे.
