डिएपी खताऐवजी पर्यायी खतांचा वापर करा : कृषी विभागाचा शेतकऱ्यांना सल्ला
The गडविश्व
ता. प्र /धानोरा, दि. २४ : खरिप हंगामाला सुरुवात झाली असून शेतकरी शेतीची तयारी करत आहेत. यंदा पेरणीपूर्व नियोजन करताना अन्नद्रव्य व्यवस्थापनावर भर देणे अत्यावश्यक आहे. महाराष्ट्र राज्य मृदा परीक्षण व जमिनीच्या आरोग्य पत्रिकांवर आधारित एकात्मिक अन्नद्रव्य व्यवस्थापन प्रणालीच्या वापरात आघाडीवर आहे.
सध्या राज्यभरात डिएपी (Di-Ammonium Phosphate) खताची मागणी वाढलेली आहे. या खतात १८% नत्र आणि ४६% स्फुरद असते. मात्र, या खताची मर्यादित उपलब्धता लक्षात घेता कृषी विभागाने पर्यायी खतांचा वापर करण्याचा सल्ला दिला आहे.
एसएसपी (Single Super Phosphate) हे खत डिएपीला चांगला पर्याय ठरू शकतो. यामध्ये १६% स्फुरद, सल्फर आणि इतर सूक्ष्म अन्नद्रव्ये असतात. विशेषतः तेलबिया पिकांसाठी हे खत फायदेशीर ठरते. डिएपीच्या एका गोणीऐवजी अर्धी गोणी युरिया व तीन गोणी एसएसपी खताचा वापर केल्यास समान परिणाम मिळतो.
याशिवाय, एनपीके प्रकारातील संयुक्त खते जसे की 10:26:26, 20:20:0:13, 12:32:16 आणि 15:15:15 यांचा वापर केल्यास नत्र, स्फुरद तसेच पालाशही पिकांना मिळते, जे वाढीसाठी अत्यावश्यक आहे.
टिएसपी (Triple Super Phosphate) मध्ये देखील ४६% स्फुरद असून, डिएपीऐवजी टिएसपी एक गोणी आणि अर्धी गोणी युरिया वापरल्यास उत्तम पर्याय उपलब्ध होतो.
कृषी विभागाने शेतकऱ्यांना आवाहन केले आहे की, या खरिप हंगामात केवळ डिएपीवर अवलंबून न राहता बाजारात उपलब्ध असलेल्या पर्यायी खतांचा योग्य निवड व वापर करावा, जेणेकरून उत्पादनात वाढ होईल आणि अन्नद्रव्यांचा समतोल राखता येईल.
