धानाला साडेतीन हजार हमीभाव न मिळाल्यास खरेदी केंद्र बंद पाडणार
– डाव्या पक्षांचा शासनाला इशारा ; खरेदी केंद्रांवर धान न नेण्याचे शेतकऱ्यांना आवाहन
The गडविश्व
गडचिरोली, दि. २२ : वाढत्या महागाई आणि नैसर्गिक आपत्तीमुळे धान शेती प्रचंड अडचणीत सापडलेली असतांनाही राज्य शासन व केंद्र सरकार योग्य हमीभाव वाढीकडे कानाडोळा करीत असल्याने धान उत्पादक शेतकऱ्यांच्या हक्कांसाठी आक्रमक भूमिका घेत धानाला साडेतीन हजार रुपये हमीभाव दिल्याशिवाय जिल्ह्यातील एकही शासकीय धान खरेदी केंद्र सुरु होवू देणार नाही, असा इशारा शेतकरी कामगार पक्ष व मार्क्सवादी कम्युनिस्ट पक्ष या डाव्या पक्षांनी शासनाला दिला आहे.
याबाबत जिल्हाभरातील धान उत्पादक शेतकऱ्यांना आवाहन करताना डाव्या पक्षांची म्हटले आहे की, रात्रंदिवस राबराब मेहनत करूनही शासनाला धान उत्पादक शेतकऱ्यांच्या विषयी आपुलकी राहिलेली नाही. सन २०२५ – २६ या खरीप हंगामाकरिता सामान्य धानाला केवळ १५६९/- रुपये उत्पादन खर्च धरून दीडपट हमीभाव फक्त २३६९/- रुपये तर ‘अ’ श्रेणी धानाला २३८९/- रुपये हमीभाव जाहीर करून शेतकऱ्यांच्या घामाची शासनाने चेष्टा केलेली आहे. ‘अ’ श्रेणी धानाला यावर्षी काही ठिकाणी खुल्या बाजारात ३५००/- ते ३६००/- रुपये चा दर मिळालेला असताना शासनाला किमान हमीभाव ३५००/- द्यायला काय अडचण आहे? असा सवालही करण्यात आला आहे.
राज्यकर्ते आणि अधिकारशाहीचे खिसे भरण्यासाठी हमीभावात वाढ टाळली जात असेल तर, शेतकऱ्यांनी एकत्र येऊन हमीभाव वाढीसाठी संघर्ष करणे गरजेचे झाले आहे. त्यामुळे आता धानाला ३५००/- रुपये हमीभाव शासन देत नाही, तोपर्यंत आर्थिक अडचणी असली तरीही गडचिरोली जिल्ह्यातील आदिवासी विकास महामंडळ, जिल्हा मार्केटिंग फेडरेशन किंवा अन्य कोणत्याही शासकीय धान खरेदी केंद्रांवर शेतकऱ्यांनी आपले धान विक्रीला नेऊ नये. असे आवाहनही करण्यात आले आहे.
तसेच जिल्ह्यात जे खरेदी केंद्र आहेत ते शेतकऱ्यांच्या सहकारी संस्थांमार्फत चालवली जात असून हमीभाव मिळेपर्यंत जिल्ह्यातील कोणत्याही संस्थांनी खरेदी केंद्र सुरू करू नये. कमिशनखोरीपोटी शेतकऱ्यांशी गद्दारी करून शासनाच्या इशाऱ्यावर जे खरेदी केंद्र सुरू करण्यात येतील ते खरेदी केंद्र शेतकऱ्यांच्या वतीने बंद पाडण्यात येतील, असा इशारा देवून जिल्हाभरातील शेतकऱ्यांनी साडेतीन हजार रुपये हमीभावासाठी एकत्र येण्याचे आवाहनही शेतकरी कामगार पक्षाचे जिल्हा चिटणीस भाई रामदास जराते, मार्क्सवादी कम्युनिस्ट पक्षाचे जिल्हा सचिव काॅ. अमोल मारकवार, भाई शामसुंदर उराडे, जयश्रीताई वेळदा, भाई अक्षय कोसनकर, शेतकरी आघाडीचे जिल्हाध्यक्ष गोविंदा बाबनवाडे, महिला जिल्हाध्यक्षा कविता ठाकरे, जिल्हा समिती सदस्य डाॅ. गुरुदास सेमस्कर, अशोक किरंगे, चंद्रकांत भोयर, तुळशिदास भैसारे, पांडुरंग गव्हारे, दामोदर रोहणकर, चिरंजीव पेंदाम,पवित्र दास, प्रभाकर गव्हारे, शर्मीश वासनिक, डंबाजी भोयर, रामदास आलाम व पदाधिकाऱ्यांनी दिला आहे.
#thegdv #thegadvishva #gadchirolinews #gadchirolipolice
