– सर्व राजकीय, ग्रामपंचायत पदाधिकाऱ्यांची उपस्थिती आवश्यक
The गडविश्व
ता, प्र / धानोरा, दि. १४ : धानोरा तालुक्यातील सरपंच पदाच्या आरक्षणासाठी महत्त्वपूर्ण सोडत १५ जुलै २०२५ रोजी दुपारी १२.०० वाजता तहसील कार्यालय, धानोरा येथे आयोजित केली जाणार आहे. या सोडतीसाठी सर्व सन्माननीय ग्रामपंचायत सदस्य, उपसरपंच, सरपंच, राजकीय पक्षांचे पदाधिकारी आणि प्रतिष्ठीत नागरिक यांना उपस्थित राहण्याचे आवाहन करण्यात आले आहे.
महाराष्ट्र शासनाच्या राजपत्रानुसार, तसेच जिल्हाधिकारी, गडचिरोली यांच्या कार्यालयीन पत्रानुसार, २०२५-३० कालावधीसाठी सरपंच पदाचे आरक्षण निश्चित करण्यासाठी १५ जुलैला तहसील कार्यालयात आरक्षण सोडत प्रक्रिया पार पडेल. याआधी, २०२०-२५ कालावधीसाठी आरक्षण निश्चित करण्यात आले होते. मात्र, कालावधी संपल्यामुळे आता नवीन आरक्षण प्रक्रिया सुरू केली जात आहे.
धानोरा तालुका हा संपर्ण अनुसूचीत जमाती क्षेत्रात (PESA) समाविष्ट असल्यामुळे तालुक्यातील ६१ ग्रामपंचायतींपैकी ३१ ग्रामपंचायतीतील सरपंच पद अनुसूचित जमातीसाठी राखीव ठेवले गेले आहे, तर उर्वरित ३० ग्रामपंचायतींमध्ये सामान्य सरपंच पदासाठी आरक्षण निश्चित करण्यात आले आहे.
राजकीय आणि सामाजिक क्षेत्रातील प्रमुखांची उपस्थिती महत्त्वाची
आगामी आरक्षण सोडत ही तालुक्यातील ग्रामपंचायतींच्या निवडणुकीसाठी अत्यंत महत्त्वाची ठरणार आहे. यामुळे सर्व संबंधित पदाधिकाऱ्यांची आणि राजकीय पक्षांच्या प्रतिनिधींची उपस्थिती अनिवार्य आहे. सुसंस्कृत, सुव्यवस्थित आणि पारदर्शक प्रक्रिया सुनिश्चित करण्यासाठी सर्व पक्षांच्या सहकार्याची आवश्यकता आहे.
राजकीय आणि सामाजिक क्षेत्रातील प्रतिनिधींनी या सोडतीसाठी नियोजित वेळी उपस्थित राहून तालुक्याच्या विकासासाठी योग्य आरक्षण पद्धती ठरवण्यास हातभार लावावा, अशी अपेक्षा व्यक्त केली जात आहे.
