– मुक्तिपथ अभियानाच्या पुढाकार
The गडविश्व
गडचिरोली, दि. २८ : नगरपरिषद निवडणुका स्वच्छ, प्रलोभनमुक्त आणि पारदर्शक व्हाव्यात, या उद्देशाने गडचिरोली, वडसा आणि आरमोरी या तीन नगरपरिषद क्षेत्रांमध्ये दारूमुक्त निवडणुकीची भव्य मोहीम जोरात राबवली जात आहे. मुक्तिपथ अभियानाच्या पुढाकाराने 226 नगरसेवक पदाचे उमेदवार आणि 15 नगराध्यक्ष पदाचे उमेदवारांनी दारूमुक्त निवडणुकीचे लेखी तसेच व्हिडिओ रेकॉर्डेड वचननामे सादर करून स्वच्छ लोकशाहीची दिशा दाखवली आहे. उर्वरित उमेदवारांकडूनही वचननामे घेण्याची प्रक्रिया सुरूच आहे.
शहरातील प्रमुख चौक, बाजारपेठ, वॉर्डांमध्ये विविध ठिकाणी बॅनर–पोस्टरद्वारे जनजागृती, तसेच मतदार-जागृती सभा, स्वीप उपक्रम आणि मुक्तिपथ स्वयंसेवकांच्या चर्चासत्रांद्वारे नागरिकांना दारूमुक्त मतदानाचे महत्त्व पटवून देण्याचे काम सातत्याने सुरू आहे. अनेक वॉर्डांतून दारूमुक्त निवडणुकीचे ठराव एकमुखाने मंजूर होत असून नागरिकांचा उत्स्फूर्त प्रतिसाद मिळत आहे.
निवडणूक काळात उमेदवार दारूच्या व्यसनापासून दूर राहणे, दारूवाटप न होणे, विक्रीबंदी कडकपणे लागू राहणे, तसेच नशेत मतदान केल्यास चुकीचा प्रतिनिधी निवडला जाऊ शकतो – या महत्त्वाच्या मुद्द्यांवर जनतेला जाणीव करून दिली जात आहे. “दारूमुक्त निवडणूक म्हणजे विकासमुखी शहराचा पाया,” हा संदेश मोहिमेच्या माध्यमातून स्पष्टपणे पोहोचवला जात आहे.
लोकसभा, विधानसभा व ग्रामपंचायत निवडणुकांमध्ये दारूमुक्त वातावरण निर्माण करण्यासाठी मिळालेल्या उत्तम प्रतिसादानंतर, यंदाच्या नगरपरिषद निवडणुकीतही नागरिक, सामाजिक संस्था आणि प्रशासन यांचे संयुक्त प्रयत्न अधिक जोमाने दिसत आहेत.
दारूमुक्त निवडणूक केवळ एक उपक्रम न राहता, शहरवासीयांचा निर्धार आणि उमेदवारांचा स्वच्छ राजकारणाचा संकल्प असा हा जनआंदोलनात्मक उपक्रम बनला असून यामुळे या निवडणुका अधिक शिस्तबद्ध, शांततापूर्ण आणि लोकशाहीवादी वातावरणात पार पडतील अशी व्यापक अपेक्षा व्यक्त केली जात आहे.
