The गडविश्व
गडचिरोली, दि. ०६ : अतिदुर्गम गडचिरोली जिल्ह्यातील हेडरी येथे ड्युटीवर असताना अचानक हृदयविकाराचा झटका आलेल्या पोलिस नाईक राहुल गायकवाड यांचा जीव लॉईड्स मेटल्स अ‍ॅण्ड एनर्जी लिमिटेडचे व्यवस्थापकीय संचालक बी. प्रभाकरन यांच्या तातडीच्या आणि माणुसकीने भारलेल्या निर्णयामुळे वाचला. त्यांनी कंपनीचे खासगी हेलिकॉप्टर केवळ उपलब्ध करूनच दिले नाही, तर स्वतः पायलटची जागा घेऊन रुग्णाला थेट नागपूरच्या रुग्णालयात सुखरूप पोहोचवले.
ही घटना २ ऑगस्ट रोजी घडली. प्रभाकरन गडचिरोली दौऱ्यावर होते आणि हेडरी येथील सुरजागड खाण क्षेत्राची पाहणी करत होते. याचदरम्यान, एसआरपीएफ ग्रुप-२ मध्ये कार्यरत असलेले ३७ वर्षीय पोलिस नाईक राहुल गायकवाड यांना छातीत तीव्र वेदना झाल्याने लॉईड्स काली अम्माल मेमोरियल हॉस्पिटलमध्ये दाखल करण्यात आले. ईसीजी तपासणीत त्यांना गंभीर स्वरूपाचा हृदयविकाराचा झटका – अँटीरियर लॅटरल वॉल मायोकार्डियल इन्फार्क्शन – आल्याचे स्पष्ट झाले.
डॉक्टरांनी तत्काळ आयसीयूमध्ये उपचार सुरू केले. मात्र, त्यांना उच्चस्तरीय उपचारासाठी तातडीने नागपूरच्या रुग्णालयात हलवणे आवश्यक होते. पोलिस विभागाच्या विनंतीनंतर प्रभाकरन यांनी वेळ न दवडता कंपनीचे हेलिकॉप्टर तैनात केले. विशेष म्हणजे, वैध पायलट लायसन्स असलेले प्रभाकरन यांनी स्वतः हेलिकॉप्टर उडवण्याचा निर्णय घेतला आणि २:४५ वाजता हेडरीहून उड्डाण केले.
रुग्णासोबत नर्सिंग स्टाफही हेलिकॉप्टरमध्ये उपस्थित होता. अवघ्या ५५ मिनिटांत, ३:४० वाजता हेलिकॉप्टर नागपूर विमानतळावर उतरले. तिथून तत्काळ ऑरेंज सिटी हॉस्पिटलमध्ये हलवून आवश्यक ते सर्व उपचार करण्यात आले. तपासणीत त्यांच्या हृदयातील एक धमनी पूर्णपणे बंद असल्याचे दिसले. तात्काळ ‘स्टेंट’ बसवून त्यांच्यावर उपचार करण्यात आले आणि ५ ऑगस्ट रोजी त्यांना डिस्चार्ज देण्यात आला.
या साऱ्या प्रसंगात प्रभाकरन यांनी दाखवलेली तत्परता, संवेदनशीलता आणि धाडस प्रशासन तसेच पोलीस दलात कौतुकाचा विषय बनला आहे. केवळ एका कर्मचाऱ्याच्या जीवासाठी स्वतःच्या व्यस्त वेळापत्रकातील सर्व कार्यक्रम रद्द करून, पायलटच्या भूमिकेतून त्यांनी माणुसकीची अनमोल उंची गाठली.
#thegadvishva #thegdv #gadchirolinews #LMELEmergencyRescue #HumanityInAction #PoliceLifeSaved #BPrabhakaran #Gadchiroli #AirliftedToSafety #EmergencyHelicopterRescue #CorporateSocialResponsibility #HeartAttackSurvivor #SRPF
#माणुसकीचा_आकाशवाटेचा_प्रवास #गडचिरोली #एलएमईएल #पोलिससेवा #बीप्रभाकरन #हृदयविकार #EmergencyAirlift
