– शासनाच्या ढिसाळतेचा जीवघेणा परिणाम!”
The गडविश्व
ता. प्र / कुरखेडा, दि. १ : गडचिरोली जिल्ह्यातील कुरखेडा तालुक्यातील चारभट्टी गावात वनपट्ट्याच्या जाचक अटी आणि प्रशासनाच्या ढिसाळतेमुळे हताश झालेल्या ५५ वर्षीय शेतकरी जगदीश गुरुपंच यांनी विषप्राशन करून आत्महत्या केल्याची हृदयद्रावक घटना उघडकीस आली आहे. २० वर्षांहून अधिक काळापासून वनजमिनीवर कसोशीने शेती करणाऱ्या गुरुपंच यांना वनपट्टा न मिळाल्याने कोणत्याही शासकीय योजनांचा लाभ मिळू शकला नाही, आणि त्यातून उद्भवलेल्या तणावाने त्यांनी स्वतःचा जीव घेतला.
“इतरांना पट्टे मिळाले… आम्हाला नाही!”
गुरुपंच यांच्या पत्नी गुणाबाई यांनी दिलेल्या निवेदनात म्हटले आहे की, गावातील अनेक शेतकऱ्यांना वनजमिनीचे पट्टे मंजूर झाले, मात्र सतत पाठपुरावा करूनही त्यांच्या पतीला पट्टा नाकारण्यात आला. २००२ पासून शेती करीत असूनही शासकीय योजनांचा लाभ न मिळाल्याने पीककर्ज, बियाणे, खते यासाठी आर्थिक मदतीचा मार्ग बंद झाला होता. पेरणीच्या तोंडावर निर्माण झालेला हा ताण असह्य झाल्याने त्यांनी २८ जून रोजी विषप्राशन केले.
कुटुंबीयांनी तातडीने त्यांना कुरखेडा उपजिल्हा रुग्णालयात दाखल केले, तेथून प्रकृती चिंताजनक झाल्याने गडचिरोली जिल्हा रुग्णालयात हलवण्यात आले. मात्र, २९ जूनच्या पहाटे ३:३० वाजता उपचारादरम्यान त्यांचा मृत्यू झाला.
शेती संपली, आधार गेला
गुरुपंच यांच्या पश्चात पत्नी, दोन मुले व दोन विवाहित मुली असा कुटुंबीय आहे. शेती हा त्यांचा एकमेव आधार होता. आता पेरणीच्या ऐन सिझनमध्ये कुटुंब अन्नपाण्यासाठीही संघर्ष करणार असल्याची स्थिती आहे. स्थानिक नागरिकांनी आणि शेतकरी संघटनांनी प्रशासनाच्या निष्क्रियतेवर संताप व्यक्त केला आहे.
गैरआदिवासी शेतकऱ्यांचे दुर्लक्षित वास्तव
गडचिरोली जिल्ह्यात मोठ्या प्रमाणावर गैरआदिवासी शेतकरी वर्षानुवर्षे वनजमिनीवर शेती करत असूनही वनहक्क कायद्याअंतर्गत (FRA 2006) त्यांना अद्याप पट्टे मिळालेले नाहीत. यामुळे ते शासकीय योजनांपासून वंचित राहत असून त्यांची आर्थिक स्थिती अधिकच खालावली आहे.
विशेष म्हणजे, जिल्ह्यात १२,००० हून अधिक अर्ज प्रलंबित असून, त्यातील बहुतांश गैरआदिवासी आहेत.
“हा मृत्यू नव्हे, प्रशासकीय हत्या!”
स्थानिक सामाजिक कार्यकर्ते आणि शेतकरी संघटनांनी या घटनेवर तीव्र संताप व्यक्त करत हा मृत्यू नव्हे, तर प्रशासनाच्या दुर्लक्षामुळे घडलेली “प्रशासकीय हत्या” असल्याचा आरोप केला आहे. त्यांनी तातडीने वनपट्टे मंजुरी प्रक्रिया वेगवान करून, जाचक अटी शिथिल करण्याची व सर्व पात्र शेतकऱ्यांना हक्काचे पट्टे देण्याची मागणी केली आहे.
पोलिसांकडून नोंद, मात्र राजकीय प्रतिक्रिया शांत
कुरखेडा पोलिसांनी आत्महत्येची नोंद घेतली असून तपास सुरू आहे. मात्र, अद्याप कोणत्याही वरिष्ठ अधिकाऱ्याने कुटुंबाची भेट घेतलेली नाही, की आर्थिक मदतीची घोषणा झालेली नाही. परिणामी, स्थानिक ग्रामस्थ व शेतकरी संघटनांनी लवकरच आंदोलन छेडण्याचा इशारा दिला आहे.
#thgdv #thegadvishva #gadchiroilnews #FarmerSuicide #ForestRights #Gadchiroli #AdministrativeFailure #LandRightsCrisis #NonTribalFarmers #JusticeForFarmers #RuralNeglect #FRA2006 #AgrarianDistress #शेतकरीआत्महत्या #वनपट्टा #गैरआदिवासीशेतकरी
#गडचिरोली #प्रशासकीयउपेक्षा #शासनाचीनिष्क्रियता #शेतकऱ्यांचा संघर्ष #वनहक्ककायदा #न्यायमिळावा #चारभट्टीघटना
