– आपची धडाकेबाज पोलखोल
The गडविश्व
ता. प्र / कुरखेडा, दि. २१ : वडसा वनविभागाच्या पुराडा वनपरिक्षेत्रात तब्बल नऊ (९) मौल्यवान सागवान वृक्षांची अवैध कटाई करून चोरट्यांनी थेट मुरूम टाकून पळवाटेसाठी नवीन रस्ताच तयार केल्याचा धक्कादायक प्रकार उघडकीस झाला आहे. हा सर्व प्रकार वनपरिक्षेत्र कार्यालयापासून केवळ दोन ते अडीच किलोमीटर अंतरावर आणि मुख्य मार्गालगत घडूनही संबंधित अधिकारी “घटनेची माहिती नव्हती” असा दावा करीत असल्याने वन विभागाच्या कार्यक्षमतेवर गंभीर प्रश्नचिन्ह निर्माण झाले आहे. आम आदमी पार्टीने या प्रकरणाची धडाकेबाज पोलखोल केल्यानंतर वन विभागात खळबळ उडाली आहे.
सदर गंभीर प्रकार रामगड उपक्षेत्रातील नियत क्षेत्र कक्ष क्रमांक २४१ येथील असून ऑगस्ट २०२५ मध्ये ही कटाई मशिनरीच्या वापराने झाल्याचे ठोस पुरावे घटनास्थळी आढळले. नव्याने टाकलेला मुरूमाचा रस्ता आणि नऊ सागवानांच्या थव्यांचे (stumps) अवशेष पाहता ही कारवाई अधिकाऱ्यांच्या संगनमतानेच पार पडल्याचा संशय घट्ट झाला आहे.
या प्रकरणी आपच्या गडचिरोली जिल्हा अनुसूचित जाती आघाडीचे अध्यक्ष सत्यवान रामटेके यांनी २० नोव्हेंबर २०२५ रोजी गडचिरोली वनवृत्ताचे मुख्य वनसंरक्षक रमेश कुमार यांच्याकडे लेखी तक्रार दाखल केली. तक्रारीत पुराडा वनपरिक्षेत्र अधिकारी आर. एच. चौधरी, वनक्षेत्र सहाय्यक बी. यु. तागडे आणि वनरक्षक टी. आर. भुरकुडे यांच्यावर घटनेची कल्पना असूनही जाणूनबुजून दुर्लक्ष केल्याचे, चोरट्यांना पाठीशी घातल्याचे, वरिष्ठांपासून प्रकरण लपवण्याचा प्रयत्न केल्याचे आणि स्वतःचे रक्षण करण्यासाठी अज्ञात आरोपीनाव गुन्हा दाखल केल्याचे गंभीर आरोप करण्यात आले आहेत.
रामटेके यांनी या तिन्ही अधिकाऱ्यांचे तात्काळ निलंबन करण्याची तसेच अवैध कटाईबाबतचा संपूर्ण दंड त्यांच्याकडून वसूल करण्याची मागणी केली आहे. यावर तातडीने कारवाई न झाल्यास उपोषणासह तीव्र जनआंदोलन छेडणार असल्याचा इशारा त्यांनी दिला आहे.
दरम्यान, वन विभागाकडून या संवेदनशील प्रकरणावर कोणतीही अधिकृत प्रतिक्रिया आलेली नसून, आपच्या पोलखोलीनंतर गडचिरोलीतील वन व्यवस्थापनाच्या विश्वसनीयतेवर पुन्हा एकदा मोठे प्रश्नचिन्ह उभे राहिले आहे.
#thegdv #thegadvishva #gadchirolinews #Gadchiroli #IllegalLogging #TeakSmuggling #ForestDeptScam #AAPExposed #Corruption #ForestCrime #MaharashtraNews #BreakingNews #GadchiroliUpdate #EnvironmentalCrime #ForestMafia #TeakTheft #PublicAccountability
