गोंदिया : एमएमसी झोनचा प्रवक्ता ‘अनंत’सह ११ नक्षलवाद्यांचे आत्मसमर्पण

गोंदिया : एमएमसी झोनचा प्रवक्ता ‘अनंत’सह ११ नक्षलवाद्यांचे आत्मसमर्पण
– ८९ लाखांच्या इनामी नक्षलवाद्यांनी एकाचवेळी शस्त्रत्याग
The गडविश्व
गोंदिया, दि. २९ : महाराष्ट्र–मध्यप्रदेश–छत्तीसगड (एमएमसी) विशेष क्षेत्रीय समितीचा कुप्रसिद्ध प्रवक्ता विकास नागपुरे उर्फ नवज्योत उर्फ ‘अनंत’सह तब्बल ११ जणांनी शुक्रवार २८ नोव्हेंबर रोजी गोंदिया जिल्हा पोलिसांसमोर शांततेचा मार्ग स्वीकारत आत्मसमर्पण केल्याची माहिती समोर येत आहे.
या सर्व नक्षलवाद्यांवर मिळून ८९ लाख रुपयांचे बक्षीस जाहीर होते. विशेष म्हणजे, एकाचवेळी ११ नक्षलवाद्यांनी शरणागती पत्करण्याची ही गोंदियातील पहिलीच घटना असल्याने जिल्हा पोलिसांनी याला महत्त्वपूर्ण यश म्हटले आहे.

सरकारशी वाटाघाटीनंतर अखेर शरणागती

एमएमसी झोनचा प्रवक्ता अनंत याने २४ नोव्हेंबर रोजी पत्र जारी करून आत्मसमर्पणाची तयारी दर्शवत १५ फेब्रुवारीपर्यंत मुदत मागितली होती. मात्र छत्तीसगडचे गृहमंत्री विजय शर्मा यांनी ‘अधिक वेळ नाही; माओवादीांनी तत्काळ शस्त्रत्याग करावा,’ असे आवाहन केले होते. यानंतर २७ नोव्हेंबरला माओवादीांनी १ जानेवारी रोजी सामूहिक आत्मसमर्पण करण्याचे जाहीर केले होते. परंतु त्यापूर्वीच अनंत व त्याच्या टीमने गोंदिया पोलिसांशी थेट संपर्क साधत आत्मसमर्पणाची इच्छा व्यक्त केली.
मागील चार-पाच दिवसांपासून पोलिस यंत्रणा त्यांच्याशी सतत संपर्कात होती, अशी माहिती पोलिस उपमहानिरीक्षक (गडचिरोली विभाग) अंकित गोयल यांनी पत्रकार परिषदेत दिली. या वेळी जिल्हा पोलिस अधीक्षक गोरख भामरे व अप्पर पोलिस अधीक्षक अभय डोंगरे उपस्थित होते.
गोंदिया जिल्ह्यात दरेकसा दलमच सक्रिय होता. या दलममधील सर्व ११ सदस्यांनी अनंतच्या नेतृत्वाखाली शस्त्रे खाली ठेवल्याने जिल्हा पूर्णपणे नक्षलमुक्त होण्याचा मार्ग मोकळा झाला, असे जिल्हा पोलिस अधीक्षक गोरख भामरे यांनी सांगितले.

आत्मसमर्पण करणारे ११ इनामी नक्षलवादी

1) अनंत उर्फ विकास/नवज्योत नागपुरे, ४० वर्षे – एमएमसी झोन प्रवक्ता, मूळ चिंताखुटा (तेलंगणा)
2) नागसू उर्फ गोलू (पांडु पुसू वडे) – जि. कांकेर (छत्तीसगड)
3) रानो उर्फ रम्मी (रामे नरोटे) – गडचिरोली
4) संतू उर्फ धरमसाय पोरेटी – राजनांदगाव (छ.ग.)
5) संगिता उर्फ शेवंती पंधरे – बालाघाट (म. प्र.)
6) अनुजा उर्फ नक्के सुकलू कारा – बस्तर (छ.ग.)
7) पूजा उर्फ जुगनी उर्फ सन्नु मुडियम – बिजापूर (छ.ग.)
8) दिनेश उर्फ सादू पूलाई सोटी – सुकमा (छ.ग.)
9) रामको/शिला मडावी – गडचिरोली
10) अर्जुन उर्फ रितु दोड्डी – बिजापूर (छ.ग.)
11) प्रताप उर्फ समर (काशीराम बन्तुला) – जगीतीयाल (तेलंगणा)

या आत्मसमर्पणामुळे एमएमसी झोनला मोठा धक्का बसला असून, गोंदिया जिल्ह्याने नक्षलवादाचे सावट झुगारत नव्या सुरक्षायुगाकडे वाटचाल सुरू केली आहे.

#thegdv #thegadvishva #gadchirolinews #gadchirolipolice #gondianews #breaking #NaxalSurrender #MMCZone #Gondia #AntiNaxalOperation #Anant #PoliceSuccess #NaxalFreeDistrict #MaoistSurrender #LawAndOrder #SecurityForces #IndiaNews