– नवखे उमेदवारही आश्वासनांच्या पावसात भिजले
The गडविश्व
गडचिरोली, दि. २८ : स्थानिक नगर परिषदेच्या सार्वत्रिक निवडणुकांच्या पार्श्वभूमीवर शहरात राजकीय वातावरण तापले असून उमेदवारांकडून आश्वासनांचा अक्षरशः महापूर आलेला दिसत आहे. विशेष म्हणजे, ज्यांच्या हातात गेल्या पाच वर्षांत सत्ता होती तेच आता ‘अजूनही अनेक समस्या प्रलंबित आहेत’ असे सांगत मतदारांच्या दारी फिरत असून नागरिकांकडून तीव्र प्रतिक्रिया उमटत आहेत. ‘सत्ता असताना शांत… आता मात्र आश्वासनांचा गजर?’ असा परखड प्रश्न शहरभर चर्चेचा विषय ठरला आहे.
शहरातील समस्या कायम – नव्याने केलेले रस्ते काही दिवसांतच उखळले
गडचिरोली शहरातील प्रमुख प्रभागांमध्ये मूलभूत समस्या अवासून उभ्या आहेत. पाणीपुरवठ्याची अनियमितता, मलनिस्सारणाचा बोजवारा, कचरा व्यवस्थापनातील ढिसाळपणा या समस्या वर्षानुवर्षे कायम आहेत. त्यात नव्याने करण्यात आलेल्या रस्त्यांची गुणवत्ता इतकी निकृष्ट असल्याचे उघड झाले की काही आठवड्यांतच अनेक रस्ते उखळून पडले. मतदारांनी यावर संताप व्यक्त करत ‘ही विकासकामे निवडणुकीपुरतीच का?’ असा सवाल उपस्थित केला आहे.
जुने असोत वा नवखे
निवडणूक धुसफूसताच केवळ जुन्या सत्ताधारींचाच नव्हे तर नवख्या उमेदवारांचाही आश्वासनांचा पाऊस कोसळत आहे. शहराच्या विकासासाठी मोठे प्रकल्प, आधुनिक सुविधा, नवीन उपक्रम अशी जंगी आश्वासने दिली जात आहेत. मात्र नागरिकांची शंका कायम ‘आश्वासन देणे सोपे… पण ते प्रत्यक्षात उतरविण्याची क्षमता कोणाची?”
नवख्या उमेदवारांकडे अनुभवाचा अभाव, तर जुन्यांच्या कामगिरीवर प्रश्नचिन्ह असून अशा स्थितीत मतदार संभ्रमात असल्याचे स्पष्ट दिसत आहे.
प्रचारात नातेसंबंधांचा आधार – मतदारांचा रोष वाढतोय
‘हा आमचा काका, पुतण्या, भाऊ’ म्हणून काही उमेदवारांच्या नातेवाईकांनी प्रचारात उडी घेतली असून, घराघरांत संबंध जोडून मत मागण्याचा प्रयत्न सुरू आहे. मात्र नागरिकांनीही कडवट अनुभवांवरून प्रतिक्रिया नोंदवत ‘निवडून आल्यानंतर हे नाते टिकतच नाही’ असा टोमणा लगावला आहे.
गल्लो-गल्ली दबक्या आवाजात चर्चा – कोणावर विश्वास ठेवावा?
निवडणूक तोंडावर आली तशी शहरात गल्लो-गल्ली चर्चा रंगल्या आहेत. चहाच्या टपऱ्या, बाजारपेठा, बसथांबे, किराणा दुकाने-सगळीकडे दबक्या आवाजात राजकीय कुजबुज ऐकू येत आहे.
‘निवडणुकीपुरता उमेदवार आमच्या दारात येतो, निवडून आल्यानंतर मात्र चेहरा दिसत नाही’, ‘आधी केलेली कामे टिकली नाहीत, तर नवीन आश्वासने कशी पूर्ण होणार?’ अशा अस्वस्थ चर्चा सर्वत्र सुरू आहेत.
दरम्यान यंदाच्या निवडणुकीत मतदारांचा दृष्टिकोन बदलल्याचे चित्र दिसत आहे. जुन्या-नव्या सर्व उमेदवारांनी दिलेल्या आकर्षक आश्वासनांपेक्षा कामाचा हिशेब हेच मतदारांचे प्रमुख निकष ठरणार असल्याची चिन्हे आहेत.
यंदाच्या निवडणुकीत मतदार अधिक सजग दिसत आहेत. आश्वासनांच्या गोंगाटाला आता लोक कंटाळले असून, गेल्या कामाचा हिशेब आणि प्रत्यक्ष काम करण्याची क्षमता यावरच उमेदवारांची कसोटी लागणार आहे.
गडचिरोलीतील राजकीय वातावरणात सध्या एकच प्रश्न घुमत आहे- ‘आश्वासनांच्या पावसात मतदार भिजतील की यावेळी सुज्ञ निर्णय घेऊन शहराचा भविष्यकाळ ठरवतील?’
#thegdv #thegadvishva #gadchirolinews #gadchirolipolice #GadchiroliElections #LocalPolitics #ElectionBuzz #CityIssues #PublicDebate #PoliticalPromises #CivicConcerns #UrbanProblems #DevelopmentClaims #GroundReality #VoterVoices #PublicReaction #LocalNews #OnGroundReport #CitizenSpeak
