The गडविश्व
गडचिरोली, दि. ११ : गडचिरोली जिल्ह्यातील पाच प्रगतशील शेतकऱ्यांची कृषी विभागामार्फत विदेश अभ्यास दौर्‍यासाठी निवड झाली असून, जिल्ह्यातील शेती क्षेत्रासाठी ही अभिमानाची बाब ठरली आहे. या शेतकऱ्यांना युरोप, इस्राईल, जपान, मलेशिया, व्हिएतनाम आणि फिलिपाईन्स या देशांतील प्रगत शेती तंत्रज्ञान, जलसंधारण प्रणाली, सेंद्रिय शेती आणि मूल्यवर्धन पद्धतींचा प्रत्यक्ष अनुभव घेण्याची संधी मिळणार आहे.
या दौर्‍यासाठी कुरखेडा तालुक्यातील गुरनोली येथील परशुराम कोमाजी खुणे, गडचिरोली तालुक्यातील पारडी कुपी येथील चंद्रशेखर रामदास मुरतेली, गडचिरोली शहरातील बाळकृष्ण असुराज टेंभुर्णे आणि अरुण केवलराम हरडे, तसेच वडसा तालुक्यातील आमगाव येथील विनोद रामचंद्र जक्कनवार यांची निवड करण्यात आली आहे.
त्यापैकी खुणे, मुरतेली आणि हरडे यांची युरोप दौर्‍यासाठी, जक्कनवार यांची जपान दौर्‍यासाठी, तर टेंभुर्णे यांची मलेशिया, व्हिएतनाम आणि फिलिपाईन्स अभ्यास दौर्‍यासाठी निवड झाली आहे.
जिल्हा कृषी विभागाच्या निवड प्रक्रियेत आधुनिक तंत्रज्ञानाचा वापर करणारे, उत्पादनवाढ साधणारे आणि गुणवत्तेत सुधारणा घडवणारे शेतकरी अग्रक्रमावर ठेवण्यात आले. या शेतकऱ्यांचा विदेशातील अनुभव जिल्ह्यातील इतर शेतकऱ्यांसाठी आदर्श ठरणार आहे.
“गडचिरोली हा शेतीच्या दृष्टीने आव्हानात्मक जिल्हा असला तरी येथील शेतकऱ्यांनी नवकल्पकतेच्या माध्यमातून उत्तम प्रगती साधली आहे. विदेश दौर्‍यामुळे त्यांना जागतिक शेतीतील अत्याधुनिक तंत्रज्ञानाचा अनुभव मिळेल आणि स्थानिक पातळीवर नव्या शेती संधी निर्माण होतील,” असे जिल्हा अधीक्षक कृषी अधिकारी सौ. प्रिती हिरळकर यांनी सांगितले.
#thegdv #thegadvishva #gadchirolinews #gadchirolipolice #गडचिरोली #AgricultureInnovation #ProgressiveFarmers #GlobalExposure
