वनविभागाच्या महावाडा बीटची निवासस्थाने जीर्णावस्थेत, लाखो रुपयांचा अपव्यय
– वनविभागाची निष्काळजी
The गडविश्व
ता. प्र / धानोरा, दि. २० : चातगाव उपक्षेत्र कार्यालयाअंतर्गत महावाडा बीटमधील वनविभागाची निवासस्थाने अक्षरशः ढासळत आहेत. जंगल संरक्षणासाठी दोन दशकांपूर्वी वनरक्षक व सहाय्यक कर्मचाऱ्यांसाठी उभारलेली ही घरे आज बेवारस, भग्न आणि वापरात नसल्यामुळे शासनाचे लाखो रुपये पाण्यात गेल्याचे चित्र समोर आले आहे.
निवासस्थांच्या छपरांतून पाणी गळते, भिंतींना मोठमोठ्या भेगा, तुटकी खिडक्या-दारे, पिण्याच्या पाण्याची व शौचालयांची अमानवी स्थिती, या सर्वांमुळे कर्मचाऱ्यांना स्वतःच्या हक्काच्या निवासात राहताही येत नाही. परिणामी, चातगाववरून महावाडा बीटात येणारे वनकर्मी एक फेरी मारून परत जातात, तर पावसाळ्यात त्यांची बिकट अवस्था अधिकच गंभीर बनते.
या दुर्लक्षाचा परिणाम म्हणून गावातील काही नागरिकं ही निवासस्थाने सामान ठेवण्यासाठी वापरत असल्याचे उघड झाले आहे, जे मूळतः वनकर्मचाऱ्यांसाठी राखीव असायला हवे होते. यामुळे बीट परिसरात जंगलतस्करांचेही फावले असून, सतत उपस्थित राहून निगराणी ठेवण्याची जबाबदारी कुचकामी होते आहे.
वनविभागाच्या अक्षम्य दुर्लक्षामुळे केवळ निवासस्थांचे नुकसान नाही, तर दुर्गम भागात दिवस-रात्र कार्यरत असलेल्या वनकर्मचाऱ्यांच्या सुरक्षेलाही मोठा धोका निर्माण झाला आहे. भिंतींचे प्लॅस्टर सुटणे, बांधकाम कोसळण्याची शक्यता- ही परिस्थिती ताबडतोब उपाययोजना करण्याची गरज अधोरेखित करते.
जीर्ण निवासस्थांची तातडीने दुरुस्ती करून वापरात आणावे अशी नागरिकांची ठाम मागणी असून वनसंरक्षणाची जबाबदारी पार पाडणाऱ्या कर्मचाऱ्यांना मूलभूत निवाससुविधा न देणे ही विभागाची गंभीर चूक असल्याचे नागरिकांनी प्रशासनाच्या निदर्शनास आणून दिले आहे.
#thegdv #thegadvishva #gadchirolinews #gadchirolipolice
