गडचिरोलीत पहिल्यांदाच महिला क्रिकेट लीग : लॉयड्सतर्फे GDPL 2026 ची घोषणा
The गडविश्व
गडचिरोली, दि.२१ : जिल्ह्यातील क्रीडा क्षेत्रासाठी ऐतिहासिक ठरणारा निर्णय घेत लॉयड्स मेटल्स अँड एनर्जी लिमिटेडने GDPL 2026 टी–20 सीझनची भव्य घोषणा आज केली. या सीझनची सुरुवात १६ जानेवारी २०२६ पासून सुरू होणाऱ्या पत्रात फेऱ्यांपासून होणार असून सर्वांत खास म्हणजे, या वर्षीच्या GDPL मध्ये पहिल्यांदाच महिला क्रिकेट लीगचा समावेश करण्यात आला असून, गडचिरोलीतील महिला क्रिकेटपटूंसाठी ही सुवर्णसंधी ठरणार आहे. या सर्व स्पर्धा जिल्हा प्रेक्षागृह मैदान, धानोरा रोड, गडचिरोली येथे आयोजित केल्या जाणार आहे.
२० संघांमध्ये रंगणार पुरुष लीगची चुरस
या सीझनमध्ये १२ तालुका संघांसह ८ विभागीय संघ — पोलीस, CRPF, कलेक्टर्स इलेव्हन, जिल्हा परिषद, गोंडवाना विद्यापीठ, वन विभाग, मीडिया आणि लॉयड्स — सहभागी होत आहेत. सर्व सामने IPL व BCCI मानक T20 नियमांनुसार खेळवले जातील.
पारदर्शक स्पर्धा रचना
मागील कामगिरीनुसार ८ संघ थेट मुख्य फेरीत असतील, तर उर्वरित १२ संघ सिंगल-नॉकआऊट फेरीत भिडणार आहेत. त्यातून ६ संघ पात्र होतील आणि आणखी २ संघांची निवड लकी ड्रॉमधून होईल. अशाप्रकारे १६ संघ अंतिम फेरीत उतरतील.
संघात १६ खेळाडू आणि ४ अधिकृत सदस्य अनिवार्य ठेवण्यात आले असून, VCA नागपूर झोनमधील २ बाहेरील खेळाडू घेण्यास अनुमती देण्यात आली आहे. नोंदणी प्रक्रिया १० डिसेंबर २०२५पर्यंत पूर्ण करणे बंधनकारक आहे.
कडक नियम, काटेकोर शिस्त
प्रत्येक सामन्यात २० षटके, एका गोलंदाजाला ४ षटके, पहिली ६ षटके पॉवर प्ले, बरोबरी झाल्यास सुपर ओव्हर — असे तांत्रिक नियम निश्चित करण्यात आले आहेत. वेळेची शिस्त राखण्यासाठी ९० मिनिटांत २० षटके पूर्ण करण्याची अट लागू केली आहे.
न्यूट्रल अंपायर, मॅच रिफरी, इंटेग्रिटी ऑफिसर्स यांची नियुक्ती होणार असून, मैदानात मोबाईल फोन व कम्युनिकेशन डिव्हाइस वापरण्यास बंदी असेल. सर्व मैदानांवर फर्स्ट-एड सुविधा उपलब्ध असेल.
महिला क्रिकेटचा ऐतिहासिक अध्याय सुरू
या वर्षी पहिल्यांदाच महिला लीगची स्वतंत्र स्पर्धा होणार असून, ४ संघ दोन नॉकआऊट सामने आणि एका ग्रँड फायनलद्वारे विजेतेपदासाठी भिडणार आहेत. महिला क्रिकेटला प्रोत्साहन देण्याच्या दिशेने GDPL चा हा टर्निंग पॉइंट मानला जात आहे.
GDPL 2026 मुळे गडचिरोलीतील क्रिकेट अधिक सर्वसमावेशक, स्पर्धात्मक आणि व्यावसायिक पातळीवर पोहोचेल, असा विश्वास आयोजकांनी व्यक्त केला आहे.
#thegdv #thegadvishva #gadchirolinews #GDPL2026 #GadchiroliCricket #WomensCricket #LloydsMetals #T20League #CricketNews #SportsUpdate #GadchiroliSports #WomenInSports #LocalTalent #CricketTournament #DistrictPremierLeague
