चकमक की हत्या? हिडमा प्रकरणावर नक्षल संघटनेचे स्फोटक पत्र
The गडविश्व
विशेष प्रतिनिधी, दि. २१ : आंध्र प्रदेशातील अल्लुरी सीताराम राजू जिल्ह्यातील मारेदुमिल्ली भागात १८ नोव्हेंबर रोजी झालेल्या चकमकीवरून नक्षल संघटनेने गंभीर आणि धडकी भरवणारे आरोप केले आहेत. केंद्रीय कमिटी सदस्य माडवी हिडमा व इतरांच्या मृत्यूबाबत पोलिसांनी ‘खोटी आणि बनावट कहाणी’ रचली असल्याचा आरोप संघटनेने केंद्रीय कमिटी प्रवक्ता ‘अभय’च्या नावाने प्रसिद्ध केलेल्या पत्राद्वारे केला आहे.
पत्रानुसार, हिडमा आजारी असल्यामुळे तो विजयवाड्यात उपचारासाठी गेला होता. मात्र, ही माहिती लीक होताच १५ नोव्हेंबरला पोलिसांनी त्याला गुप्तपणे अटक केल्याचा दावा करण्यात आला आहे. त्यानंतर पत्रानुसार आंध्र प्रदेश पोलिसांनी हिडमाला मारेदुमिल्ली जंगलात नेले व १८ नोव्हेंबर रोजी चकमकीच्या नावाखाली त्याची हत्या केली. या कारवाईत हिडमा, त्याची पत्नी राजे यांसह सहा नक्षलवाद्यांचा मृत्यू ही ‘पूर्वनियोजित हत्या’ असल्याचा गंभीर आरोप करण्यात आला आहे.
याचबरोबर, १९ नोव्हेंबरला सात जणांचा एन्काउंटरही झाल्याचा दावा खोटा असल्याचे नक्षल संघटनेने म्हटले आहे. या घटनांच्या निषेधार्थ २३ नोव्हेंबरला देशव्यापी निषेध दिन पाळण्याचे आवाहनही पत्रात नमूद करण्यात आले आहे. हिडमाला मुद्दाम “खलनायक” ठरवून खोटा प्रचार रचल्याचा आरोपही नोंदवण्यात आला आहे.
दरम्यान, आंध्र प्रदेश पोलिसांनी सर्व आरोपांचे खंडन केले आहे. अल्लुरी सीताराम राजू जिल्ह्यात आयोजित पत्रकार परिषदेत पोलिस अधीक्षकांनी सांगितले की, १८ नोव्हेंबरला सकाळी प्रत्यक्ष चकमक झाली आणि त्यात हिडमा, राजे सहित सहा नक्षलवादी ठार झाले. चकमक ‘बनावट’ असल्याच्या आरोपावर त्यांनी उत्तर दिले की, नक्षलवादी दबावाखाली सतत सुरक्षा व हालचाली बदलतात, त्यामुळे अशा आरोपांना वस्तुस्थितीत आधार नसल्याचे त्यांनी सांगितले.
हिडमाच्या मृत्यूभोवती नक्षल संघटना व पोलिस यांच्यातील आरोप-प्रत्यारोप चिघळत असून, प्रकरणात नवे वळण येण्याची शक्यता व्यक्त केली जात आहे.
#thegdv #thegadvishva #gadchirolinews #gadchirolipolice #HidmaEncounter #NaxalLetter #FakeEncounterAllegation #MaredumilliOperation #AndhraPradeshPolice #Naxalism #SecurityForces #BreakingNews #IndiaNews #MaoistIssue
