धानोरा : चालत्या दुचाकीवर नियंत्रण सुटून भीषण अपघात, दोन जण जखमी
The गडविश्व
ता.प्र / धानोरा, दि. २९ : आरमोरीहून धानोराच्या दिशेने जात असलेल्या दुचाकीस्वाराचे नियंत्रण सुटल्याने लोखंडी रॉडला धडक देत झालेल्या अपघातात दोन जण गंभी जखमी झाल्याची घटना शनिवार, 29 नोव्हेंबर रोजी सकाळी सुमारे 11 वाजता आरमोरी रोडवरील नाळेवाही नाल्याजवळील वनविभागाच्या नर्सरीसमोर घडली.
उत्तर प्रदेशातील रहिवासी असलेले, परंतु सध्या आरमोरी येथे वास्तव्यास असलेले दोन्ही युवक दुचाकी (क्रमांक MH-36 P 1311) वरून धानोरा येथे जात होते. नाळेवाही नाल्यापूर्वीच चालकाचे दुचाकीवरील नियंत्रण सुटल्यामुळे ती थेट लोखंडी रॉडला जाऊन आदळली. धडकेची तीव्रता इतकी होती की दुचाकीचा चक्काचूर झाला.
या अपघातात हसमत अली शाह (वय 30) आणि अब्दुल कलाम शाह (वय 17) हे दोघे गंभीर जखमी झाले आहेत. स्थानिक नागरिकांच्या मदतीने त्यांना तात्काळ रांगी प्राथमिक आरोग्य केंद्रात उपचारासाठी दाखल करण्यात आले.
घटनेनंतर परिसरात काही काळ वाहतुकीवरही परिणाम झाला असून पुढील तपास सुरू आहे.
