धानोरा : ७ ते १५ तारखेतील ‘अन्नसप्ताहा’तच मिळणार महिन्याचं राशन
The गडविश्व
ता. प्र / धानोरा, दि. २८ : अंत्योदय अन्नयोजना आणि प्राधान्य कुटुंब योजनेचा लाभ घेणाऱ्या नागरिकांसाठी महत्त्वाची सूचना दिली असून शासनाच्या आदेशानुसार धानोरा तालुक्यात दर महिन्याच्या ७ तारखेला ‘अन्नदिन’ साजरा करत ८ ते १५ तारखेपर्यंत ‘अन्नसप्ताह’ राबवून धान्याचे वितरण पूर्ण करण्याचे नियोजन शासन स्तरावरून प्राप्त आहेत.
परंतु अनेक लाभार्थी या ठरलेल्या वेळेत धान्य उचलण्यास येत नसल्याने महिना अखेरीस दुकानात गर्दी होते. यावेळी पॉस मशीनवर अंगठा न लागणे, नेटवर्क नसणे किंवा सर्व्हर बंद असणे अशा तांत्रिक अडचणी निर्माण होतात. परिणामी दुकानदारांना धान्य देणे शक्य होत नाही आणि लाभार्थी महिन्याच्या राशनपासून वंचित राहतात, अशी परिस्थिती अनेकदा दिसून आली आहे.
ही समस्या टाळण्यासाठी प्रशासनाने सर्व लाभार्थ्यांना स्पष्टपणे सूचित केले आहे की दर महिन्याच्या ७ ते १५ तारखेदरम्यानच धान्याची उचल पूर्ण करावी. या कालावधीनंतर उशिरा आल्यास आणि कोणत्याही तांत्रिक कारणास्तव धान्य मिळाले नाही, तर यास लाभार्थी स्वतः जबाबदार राहतील, असेही प्रशासनाने नमूद केले आहे.
लाभार्थ्यांनी वेळेचे पालन करून योजनांचा लाभ वंचित राहू नये, असे आवाहन प्रशासनामार्फत करण्यात आले आहे.
#thegdv #thegadvishva #gadchirolinews #gadchirolipolice #dhanaroa news
