– विद्यार्थी, स्वयंसेवी संस्था आणि नागरिकांचा उत्स्फूर्त सहभाग
The गडविश्व
गडचिरोली, दि. १३ : स्वातंत्र्याचा अमृत महोत्सव आणि केंद्र शासनाच्या “हर घर तिरंगा” अभियानाला गडचिरोलीत देशभक्तीच्या उत्साहाची पर्वणी लाभली. नगर परिषद गडचिरोलीच्या वतीने मंगळवारी शहरात भव्य तिरंगा सायकल रॅलीचे आयोजन करण्यात आले, ज्यामध्ये शेकडो विद्यार्थी, स्वयंसेवी संस्था आणि नागरिकांनी उत्स्फूर्त सहभाग नोंदवला.
रॅलीची सुरुवात इंदिरा गांधी चौकातील सार्वजनिक बांधकाम विभागाच्या विश्रामगृहातून झाली. हातात तिरंगा घेऊन, “भारत माता की जय” आणि “वंदे मातरम्”च्या घोषणा देत शहरातील मुख्य मार्गावरून निघालेल्या सायकलस्वारांनी संपूर्ण वातावरण देशभक्तीमय केले. नागरिकांनी रस्त्याच्या कडेला उभे राहून या रॅलीचे स्वागत केले.
या देशप्रेमाच्या प्रवासात नगर परिषदेचे कर्मचारी, महाविद्यालयीन विद्यार्थी-प्राध्यापक, सायकल स्नेही मंडळ, क्रीडापटू, स्थानिक लोकप्रतिनिधी आणि स्वयंसेवी संस्थांचा मोठा सहभाग होता. रॅलीचा समारोप एकता पार्क येथे झाला, जिथे सहभागींसाठी लघु देशभक्तीपर कार्यक्रमाचे आयोजन करण्यात आले.
२ ऑगस्ट ते १५ ऑगस्टदरम्यान राज्य शासनाच्या मार्गदर्शक सूचनांनुसार विविध देशभक्तीपर उपक्रम राबवले जात असून, गडचिरोलीतील ही रॅली हर घर तिरंगा अभियानाच्या यशात एक प्रेरणादायी पर्व ठरली.
#thegdv #thegadvishva #gadchirolinews #gadchirolipolice #हरघरतिरंगा #गडचिरोली #स्वातंत्र्याचा_अमृत_महोत्सव #तिरंगारॅली #देशभक्ती #HarGharTiranga #Gadchiroli #AzadiKaAmritMahotsav #TirangaRally #Patriotism
