– कारगिल विजय दिनानिमित्त ‘अमर जवान’ स्मारकाजवळ भरपावसात देशप्रेमाचा अभंग आदर
The गडविश्व
गडचिरोली, दि. २६ : कारगिल विजय दिनानिमित्त गडचिरोलीतील अमर जवान स्मारक परिसर आज भर पावसातही देशभक्तीच्या जल्लोषाने गगनभेदी घोषणांनी दुमदुमून गेला. कारगिल युद्धात प्राणांची आहुती देणाऱ्या शहीद वीरांना कृतज्ञतेने मानवंदना देण्यासाठी नागरिक, विद्यार्थी, माजी सैनिक आणि मान्यवर अश्रूंच्या ओंजळीतून ‘शहिदों को सलाम’ करत नतमस्तक झाले.
कारगिल चौक येथे दरवर्षीप्रमाणे दुर्गा उत्सव मंडळाच्या वतीने, लॉयड मेटल अँड एनर्जी लिमिटेड कोणसरी, कारगिल स्मारक समिती, शासकीय पुनर्नियुक्ती माजी सैनिक संघटना आणि जिल्हा प्रशासन यांच्या संयुक्त विद्यमाने हा श्रद्धांजली कार्यक्रम उत्साहात साजरा करण्यात आला. सकाळी ९.३० वाजता सुरू झालेल्या कार्यक्रमाच्या वेळी मुसळधार पावसाचे आगमन झाले, पण ते देशभक्तीच्या ओलाव्यापुढे क्षीण ठरले. नागरिक आपल्या छत्र्याखाली, तर अनेकजण ओलेचिंब अवस्थेतच उभे राहून वीर जवानांना मानाचा मुजरा करत होते.
कार्यक्रमाची सुरुवात ‘अमर जवान’ स्मारकास पुष्पांजली अर्पणाने झाली. राष्ट्रगीत आणि राज्यगीताच्या गजरात वातावरण भारावून गेले. उपस्थितांच्या तोंडून “भारत माता की जय”, “वंदे मातरम” आणि “शहीद जवान अमर रहें” अशा घोषणांनी परिसर दुमदुमला. पावसाचे थेंब आणि भावना, दोन्ही एकत्र वाहत होत्या. अनेकांच्या डोळ्यात अश्रू होते, तर ओठांवर शहीदांविषयी अपार कृतज्ञता.
कार्यक्रमाच्या अध्यक्षस्थानी लॉयड मेटल अँड एनर्जीचे निवासी संचालक निवृत्त कर्नल विक्रम मेहता होते. प्रमुख पाहुणे म्हणून माजी खासदार अशोकराव नेते, खासदार नामदेवराव किरसान, कारगिल चौक अध्यक्ष उदय धकाते, व्यापारी संघटनेचे अध्यक्ष घिसूलाल काबरा, लॉयडचे हिम्मतसिंह बेडला, नटराजन, मुख्याधिकारी सूर्यकांत पिदुरकर, तसेच विविध दलांतील निवृत्त अधिकारी, माजी सैनिक आणि समाजातील मान्यवर मोठ्या संख्येने उपस्थित होते.
या कार्यक्रमाचे आयोजन आणि यशस्वीतेसाठी दुर्गा उत्सव मंडळाच्या उपाध्यक्ष कालू गोवर्धन, सचिव प्रकाश भांडेकर, मार्गदर्शक सुनिल देशमुख, मोतीराम हजारे, नंदू कुमरे, प्रकाश धकाते, महेंद्र मसराम, रुपेश सलामे, राजू डोंगरे, सुचिता धकाते, निलिमा देशमुख, वनिता भांडेकर, अंजली भांडेकर आदी कार्यकर्त्यांनी विशेष परिश्रम घेतले. कार्यक्रमाचे सूत्रसंचालन नंदू कुमरे यांनी केले तर आभारप्रदर्शन महादेव वासेकर यांनी मानले.
राजीव गांधी प्राथमिक शाळा आणि गोंडवाना सैनिक विद्यालय, गडचिरोली येथील विद्यार्थ्यांचा सहभाग विशेष उल्लेखनीय होता. त्यांच्यातील जोश आणि समर्पण भावी पिढीच्या राष्ट्रनिष्ठेचे प्रतीक ठरले.
हा कार्यक्रम केवळ एक औपचारिक श्रद्धांजली नव्हता, तर तो देशभक्ती, वीरशौर्य आणि समाजजागृतीचा उर्जास्रोत ठरला. उपस्थित प्रत्येकाच्या मनात “शहीद कभी मरते नहीं” ही भावना पुन्हा जागी झाली आणि गडचिरोलीच्या मातीने शहिदांना ओलसर पण जाज्वल्य नमन अर्पण केले.
#thegdv #thegadvishva #gadchirolipolice #gadchirolinews #thegadvishva
