दूधमाळा गावाला करणार दारूविक्रीमुक्त

58

-महिला शक्तिपथ संघटना गठीत
The गडविश्व
गडचिरोली, दि. २४ : धानोरा तालुक्यातील दूधमाळा गावातील अवैध दारूविक्रेत्यांविरोधात कृती कार्यक्रम राबवून आपल्या गावाला अवैध दारूविक्रीमुक्त करण्याचा निर्णय महिलांनी घेतला आहे. नुकतीच मुक्तिपथ व गाव संघटनेच्या वतीने आयोजित बैठकीत महिला शक्तीपथ संघटना गठीत करण्यात आली.
दूधमाळा येथील मुक्तिपथ गाव संघटनेने केलेल्या प्रयत्नातून मागील चार ते पाच महिने अवैध दारूविक्री बंद होती. परंतु, काही विक्रेत्यांनी डोके वर काढत चोरट्या मार्गाने अवैध दारूविक्रीचा व्यवसाय पुन्हा सुरु केला. सध्यस्थितीत जवळपास सहा ते सात दारूविक्रेते सक्रिय असून व्यसनाच्या प्रमाणात वाढ होत आहे. आपल्या गावात सुरु असलेले दारूविक्री बंद करण्यासाठी महिलांकडून सातत्याने प्रयत्न केले जात आहेत. अशातच मुक्तिपथ व गाव संघटनेच्या वतीने बैठकीचे आयोजन करण्यात आले होते. यावेळी गावातील दारूविक्रीच्या मुद्द्यावर चर्चा करून पुन्हा दारूबंदी करण्यासाठी अहिंसक कृती, दारूविक्रेत्यांना नोटीस, रॅलीच्या माध्यमातून जागृती, मुजोर विक्रेत्यांवर पोलिस विभागाच्या माध्यमातून कारवाई करणे असे विविध कृती कार्यक्रम करण्याचे ठरविण्यात आले. सोबतच मुक्तिपथ-शक्तिपथ संघटना गठीत करून नवीन महिलांना सहभागी करून संघटना मजबूत करण्यात आली. दरम्यान, मुक्तिपथ तालुका टीमने दारूविक्रेत्यांविरोधात लढा देण्यासाठी विविध उपाययोजना सुचवत मार्गदर्शन केले. आपल्या गावात दारूविक्री बंदीसाठी प्रयत्न करण्याचा महिलांनी निश्चय केला असून लवकरच दुधमाळा गाव पुन्हा दारूविक्रीमुक्त होणार आहे. बैठकीत मुक्तिपथ तालुका संघटक राहुल महाकुळकर, तालुका उपसंघटक भाष्कर कडयामी व प्रेरक बुधाताई पोरटे यांच्यासह गावातील ७४ महिला उपस्थित होत्या.

(#thegdv #thegadvishva #gadchirolinews #muktipath)

LEAVE A REPLY

Please enter your comment!
Please enter your name here